🚨 पीक विमा रखडला; शिंदखेडा तालुक्यातील शेतकऱ्यांचा संताप अनावर!

शिंदखेडा (प्रतिनिधी) :

शिंदखेडा तालुक्यातील शेतकऱ्यांनी प्रधानमंत्री फसल विमा योजना (PMFBY) अंतर्गत खरीप हंगाम २०२५ च्या प्रलंबित विमा रकमेबाबत गंभीर आक्षेप घेत तहसीलदारांकडे निवेदन सादर केले आहे. पात्र असूनही अनेक शेतकऱ्यांना आजपर्यंत विमा रक्कम मिळालेली नसल्याने शेतकरी आर्थिक संकटात सापडल्याचा आरोप करण्यात आला आहे.शेतकऱ्यांच्या म्हणण्यानुसार, अनेकांनी नियमानुसार पीक विमा हप्ता भरला असतानाही त्यांना विमा लाभापासून वंचित ठेवण्यात आले आहे. यामुळे कर्जबाजारीपणा, शेतीचा वाढलेला खर्च आणि नापिकीच्या संकटात अडकलेल्या शेतकऱ्यांची परिस्थिती अधिकच बिकट झाली आहे.निवेदनात धक्कादायक आरोप करताना काही गावांमध्ये प्रत्यक्षात पीक नसतानाही विमा नोंदणी झाल्याचे नमूद करण्यात आले आहे. तर ज्या शेतकऱ्यांचे खरोखर नुकसान झाले, त्यांनाच विमा लाभ मिळाला नसल्याचा आरोप करण्यात आला आहे. यामुळे पीक विमा प्रक्रियेतील पारदर्शकतेवर प्रश्नचिन्ह निर्माण झाले आहे.याशिवाय, केंद्र सरकारची पीएम किसान सन्मान निधी योजना आणि राज्य शासनाची नमो शेतकरी महासन्मान योजना यांचे हप्तेही अनेक पात्र लाभार्थ्यांच्या खात्यावर जमा झाले नसल्याची तक्रार शेतकऱ्यांनी केली आहे.या संपूर्ण प्रकरणाची सखोल चौकशी करून दोषी अधिकारी व कर्मचाऱ्यांवर कायदेशीर कारवाई करावी, तसेच प्रलंबित विमा रक्कम आणि शासकीय योजनांचे लाभ तातडीने वितरित करावेत, अशी मागणी करण्यात आली आहे. यासंदर्भातील निवेदन तहसीलदार, जिल्हाधिकारी, कृषी विभाग, पोलिस प्रशासन आणि संबंधित पीक विमा कंपनीकडे पाठविण्यात आले आहे.दरम्यान, प्रशासनाने तातडीने दखल घेऊन सकारात्मक निर्णय न घेतल्यास १२ जून रोजी शिंदखेडा तहसील कार्यालयासमोर शांततापूर्ण आंदोलन छेडण्यात येईल, असा इशारा शेतकरी प्रतिनिधींनी दिला आहे.याबाबत बोलताना शेतकरी प्रतिनिधी महेंद्र गोकुळ पाटील (सोनू फौजी) तसेच महाराष्ट्र नवनिर्माण शेतकरी सेनेचे जिल्हाध्यक्ष विक्की राज अशोक गिरासे यांनी सांगितले की, शेतकऱ्यांवर अन्याय होऊ नये यासाठी संपूर्ण प्रक्रिया पारदर्शक करण्यात यावी व पात्र शेतकऱ्यांना त्यांचा हक्काचा लाभ तात्काळ मिळावा.