🚨 वृद्ध महिलांच्या गळ्यातील मंगळसूत्रांवर डल्ला मारणारी टोळी जेरबंद; धुळे एलसीबीने उकलले ४ गुन्हे

धुळे/प्रतिनिधी

धुळे जिल्ह्यातील शिंदखेडा तालुक्यात रात्री अंगणात झोपलेल्या वृद्ध महिलांच्या गळ्यातील सोन्याचे मंगळसूत्र चोरणाऱ्या सराईत टोळीचा स्थानिक गुन्हे शाखेने पर्दाफाश करत चार आरोपींना मुद्देमालासह जेरबंद केले आहे. या कारवाईमुळे परिसरात निर्माण झालेली भीती कमी झाली असून नागरिकांनी पोलिसांच्या कामगिरीचे कौतुक केले आहे.दि. 31 मे 2026 रोजी अमराळे (ता. शिंदखेडा) येथील फिर्यादी सतिष सुभाष पाटील यांच्या वृद्ध आई अंगणात झोपलेल्या असताना अज्ञात चोरट्यांनी त्यांच्या गळ्यातील सुमारे 5 ग्रॅम वजनाचे सोन्याचे मंगळसूत्र चोरून मोटारसायकलवरून पलायन केले होते. या घटनेनंतर शिंदखेडा पोलीस ठाण्यात गुन्हा दाखल करण्यात आला होता.या गंभीर गुन्ह्याचा समांतर तपास स्थानिक गुन्हे शाखेकडून सुरू असताना पोलीस निरीक्षक श्रीराम पवार यांना मिळालेल्या गोपनीय माहितीच्या आधारे सरवड फाटा येथे सापळा रचण्यात आला. पोउनि. चेतन मुंढे यांच्या पथकाने अतिशय नियोजनबद्ध पद्धतीने कारवाई करत चार संशयितांना दोन मोटारसायकलींसह ताब्यात घेतले.ताब्यात घेतलेल्या आरोपींमध्ये वैभव चतुर बोरसे, मुस्तफा जुमा पिंजारी, धिरज बालूसिंग गिरासे आणि भुषण रमेश पाटील यांचा समावेश आहे. चौकशीदरम्यान आरोपींनी अमराळे आणि होळ परिसरात वृद्ध महिलांचे मंगळसूत्र चोरी केल्याची कबुली दिली. तपासात या टोळीने केलेले एकूण चार चोरीचे गुन्हे उघडकीस आले आहेत.विशेष म्हणजे आरोपी वैभव बोरसे याने साथीदार मुस्तफा पिंजारीसह नवलनगर परिसरातून हिरो HF Deluxe मोटारसायकल चोरी केल्याची कबुली दिली असून चोरीची मोटारसायकलही पोलिसांनी जप्त केली आहे.या कारवाईमुळे मंगळसूत्र चोरीच्या मालिकेला आळा बसला असून आरोपींकडून आणखी गुन्ह्यांची उकल होण्याची शक्यता पोलिसांनी व्यक्त केली आहे. धुळे स्थानिक गुन्हे शाखेच्या या धडाकेबाज कारवाईमुळे गुन्हेगारांमध्ये खळबळ उडाली आहे.