🔥 भ्रष्टाचाराला ACBचा दणका; धुळेतील पुरवठा निरीक्षक जेरबंद

धुळे/प्रतिनिधी

धुळे : शेतकऱ्याच्या ज्वारी खरेदी प्रक्रियेत अडथळे निर्माण करून ५ हजार रुपयांची लाच मागणाऱ्या तहसील कार्यालय, धुळे येथील पुरवठा निरीक्षक तथा गोदाम व्यवस्थापक मनिष महेश बागुल याला लाचलुचपत प्रतिबंधक विभागाने (ACB) रंगेहात पकडल्याने जिल्ह्यात मोठी खळबळ उडाली आहे.तक्रारदार शेतकरी हे मौजे अंचाडे, ता. जि. धुळे येथील रहिवासी असून त्यांनी व त्यांच्या पत्नीने पिकविलेली ज्वारी शासनाच्या किमान आधारभूत किंमत योजनेअंतर्गत विक्रीसाठी ऑनलाइन नोंदणी केली होती. त्यानुसार दि. ३ जून २०२६ रोजी ज्वारीचा माल धुळे शासकीय गोदामात आणण्यात आला.यावेळी गोदामातील मोजणी प्रक्रिया पूर्ण झाल्यानंतर पुरवठा निरीक्षक तथा गोदाम व्यवस्थापक मनिष बागुल यांनी तक्रारदारास बाजूला बोलावून ज्वारीचा दर्जा चांगला दाखवून खरेदी प्रक्रिया आणि ऑनलाइन बिल मंजुरीसाठी ५,००० रुपयांची लाच मागितल्याचा आरोप आहे. पैसे न दिल्यास बिल प्रक्रियेत अडथळे निर्माण करण्याची धमकीही देण्यात आली.तक्रारदाराने तत्काळ लाचलुचपत प्रतिबंधक विभाग, धुळे येथे तक्रार दाखल केली. तक्रारीची पडताळणी केल्यानंतर पंचांसमक्ष लाचेची मागणी झाल्याचे निष्पन्न झाले.त्यानंतर ACBच्या पथकाने नियोजनबद्ध सापळा रचला. सापळा कारवाईदरम्यान आरोपी मनिष बागुल याने तक्रारदाराकडून ५,००० रुपयांची लाचेची रक्कम स्वतः स्वीकारताच पथकाने त्याला रंगेहात पकडले.या प्रकरणी धुळे शहर पोलीस ठाण्यात आरोपीविरुद्ध भ्रष्टाचार प्रतिबंधक कायदा, १९८८ चे कलम ७ अन्वये गुन्हा दाखल करण्यात आला आहे.ही कारवाई पोलीस उपअधीक्षक सचिन साळुंखे यांच्या मार्गदर्शनाखाली पोलीस निरीक्षक यशवंत बोरसे व त्यांच्या पथकाने यशस्वीरीत्या पार पाडली.