🚨 सोनगीर पोलिसांचा गुटखा तस्करीवर मोठा प्रहार; 23.50 लाखांचा मुद्देमाल जप्त

सोनगीर/ प्रतिनिधी

धुळे जिल्ह्यात प्रतिबंधित गुटखा तस्करीविरोधात सोनगीर पोलिसांनी मोठी कारवाई करत सुमारे 23 लाख 50 हजार रुपयांचा मुद्देमाल जप्त केला आहे. या कारवाईमुळे गुटखा तस्करांमध्ये खळबळ उडाली आहे.दिनांक 3 जून 2026 रोजी सोनगीर पोलिसांना खात्रीलायक माहिती मिळाली होती की, कानपूर येथून धुळ्याकडे येणाऱ्या महिंद्रा SMG (क्रमांक HR-55-AE-6821) वाहनातून महाराष्ट्र शासनाने प्रतिबंधित केलेला मानवी आरोग्यास अपायकारक गुटखा विक्री व वाहतुकीसाठी आणला जात आहे.माहितीच्या आधारे सोनगीर पोलीस स्टेशनचे अधिकारी व कर्मचारी यांनी राष्ट्रीय महामार्ग क्रमांक 03 वरील सोनगीर टोल नाक्याजवळ सापळा रचला. पहाटे सुमारे 3 वाजेच्या दरम्यान संशयित वाहन थांबवून तपासणी करण्यात आली.तपासणीदरम्यान वाहनात विमल पान मसाल्याच्या 37 गोण्या व विमल V-1 तंबाखूच्या 27 गोण्या आढळून आल्या. जप्त करण्यात आलेल्या मालाची किंमत सुमारे 18.50 लाख रुपये असून वाहनाची किंमत 5 लाख रुपये आहे. अशा प्रकारे एकूण 23.50 लाख रुपयांचा मुद्देमाल जप्त करण्यात आला.या प्रकरणी सोनगीर पोलीस स्टेशन गुन्हा क्रमांक 206/2026 अन्वये भारतीय न्याय संहिता 2023 मधील विविध कलमे तसेच अन्न सुरक्षा व मानके अधिनियम 2006 अंतर्गत गुन्हा नोंद करण्यात आला आहे.ही कारवाई पोलीस अधीक्षक विशाल आनंद, अपर पोलीस अधीक्षक अजय देवरे, उपविभागीय पोलीस अधिकारी संजय बांबळे आणि स्थानिक गुन्हे शाखेचे पोलीस निरीक्षक श्रीराम पवार यांच्या मार्गदर्शनाखाली करण्यात आली. कारवाईत सपोनि तुषार देवरे, पोसई प्रशांत ताकाटे, चापोसई किरण पाटील, पंकज चौधरी, यशवंत महाले, जगदीश अहिरे व रोहन वाघ यांनी ही कारवाई यशस्वी केली.