🚨 श्रीरामपूर येथील सोयाबीन बियाणे अपहार प्रकरण उघड; LCBच्या धडाकेबाज कारवाईत 30.39 लाखांचा मुद्देमाल जप्त!

अहिल्यानगर : श्रीरामपूर येथून वाहतुकीसाठी निघालेला महाबीज कंपनीच्या सोयाबीन बियाण्यांनी भरलेला ट्रक अपहार करून गायब करण्यात आल्याच्या प्रकरणाचा स्थानिक गुन्हे शाखेने (LCB) यशस्वी छडा लावत तब्बल 30 लाख 39 हजार 648 रुपयांचा मुद्देमाल हस्तगत केला आहे.मिळालेल्या माहितीनुसार, 29 मे 2026 रोजी दत्तनगर येथील गजानन रोडवेज ट्रान्सपोर्टमधून महाबीज कंपनीचे सोयाबीन बियाणे घेऊन निघालेला आयशर ट्रक (एमएच-12-व्हीएफ-6911) हा चालक जयसिंग मुक्ताजी भगत (रा. खानापूर, ता. जुन्नर, जि. पुणे) याच्याकडे विश्वासाने सुपूर्त करण्यात आला होता. मात्र संबंधित चालकाने माल योग्य ठिकाणी न पोहोचवता अपहार करण्याच्या उद्देशाने ट्रकसह माल लंपास केल्याचे समोर आले.या प्रकरणी फिर्यादी प्रदीप शिवनारायण भट्टड यांनी दिलेल्या तक्रारीवरून श्रीरामपूर शहर पोलीस ठाण्यात भारतीय न्याय संहिता 2023 च्या कलम 316(4) अन्वये गुन्हा दाखल करण्यात आला.दरम्यान, पोलीस अधीक्षक मुम्मका सुदर्शन यांच्या मार्गदर्शनाखाली आणि पोलीस निरीक्षक किरणकुमार कबाडी यांच्या नेतृत्वाखाली स्थानिक गुन्हे शाखेचे विशेष पथक तयार करण्यात आले. पोउपनि. संदीप मुरकुटे व त्यांच्या सहकाऱ्यांनी तांत्रिक विश्लेषण, गुप्त माहिती आणि व्यवसाय कौशल्याचा वापर करून तपास सुरू केला.तपासादरम्यान मिळालेल्या खात्रीशीर माहितीनुसार, अपहार केलेला ट्रक राजगुरुनगर (ता. खेड, जि. पुणे) येथील मार्केट यार्ड परिसरात उभा असल्याचे निष्पन्न झाले. पोलिसांनी तात्काळ घटनास्थळी धाव घेत ट्रकची पडताळणी केली असता, अपहार केलेला ट्रक आणि त्यामधील संपूर्ण माल ताब्यात घेण्यात आला.या कारवाईत पोलिसांनी 15 लाख रुपये किमतीचा आयशर ट्रक आणि 15 लाख 39 हजार 648 रुपये किमतीचे महाबीज कंपनीचे सोयाबीन बियाणे असा एकूण 30 लाख 39 हजार 648 रुपयांचा मुद्देमाल जप्त केला.सदर मुद्देमाल पुढील तपासासाठी श्रीरामपूर शहर पोलीस ठाण्यात जमा करण्यात आला असून प्रकरणाचा पुढील तपास सुरू आहे.