🚨 “मध्यप्रदेशातील आंतरराज्यीय घरफोडी टोळी नंदुरबार पोलिसांच्या जाळ्यात; 3 आरोपी अटकेत, 17.34 लाखांचा ऐवज जप्त, 4 गुन्ह्यांची उकल!” 🔥

नंदुरबार/प्रतिनिधी

नंदुरबार : सारंगखेडा पोलीस ठाणे हद्दीत गेल्या काही महिन्यांपासून सुरू असलेल्या घरफोडींच्या मालिकेला अखेर पूर्णविराम देण्यात स्थानिक गुन्हे शाखेला (LCB) मोठे यश आले आहे. मध्यप्रदेशातील बडवाणी जिल्ह्यातील आंतरराज्यीय घरफोडी टोळीचा पर्दाफाश करत पोलिसांनी तीन सराईत आरोपींना अटक केली असून त्यांच्या ताब्यातून तब्बल 17 लाख 34 हजार 49 रुपयांचा मुद्देमाल जप्त करण्यात आला आहे. या कारवाईमुळे सारंगखेडा पोलीस ठाणे अभिलेखावरील चार घरफोडीचे गुन्हे उघडकीस आले आहेत.दिनांक 29 ते 30 मे 2026 दरम्यान बोराळे गावातील युवराज शंकर माळी व किशोर भरत पाटील यांच्या घरांचे मागील दरवाजे तोडून अज्ञात चोरट्यांनी सोने-चांदीचे दागिने व रोख रक्कम असा एकूण 6 लाख 15 हजार 200 रुपयांचा ऐवज लंपास केला होता. याप्रकरणी सारंगखेडा पोलीस ठाण्यात भा.न्या.सं. 2023 अंतर्गत गुन्हा दाखल करण्यात आला होता.याशिवाय नांदरखेडा, फेस आणि तोरखेडा परिसरातही घरफोडीच्या घटना घडल्याने पोलिसांसमोर आरोपींचा शोध घेण्याचे मोठे आव्हान उभे राहिले होते. नंदुरबार जिल्ह्याच्या पोलीस अधीक्षक अश्विनी सानप यांच्या सूचनेनुसार स्थानिक गुन्हे शाखेने समांतर तपास सुरू केला.तपासादरम्यान 1 जून 2026 रोजी जयनगर परिसरात विना नंबर प्लेटची युनिकॉर्न मोटारसायकल घेऊन संशयास्पद हालचाली करणारा मिठाराम भावसिंग तडवी (वय 34, रा. मुहाला, ता. सेंधवा, जि. बडवाणी, म.प्र.) हा पोलिसांच्या जाळ्यात अडकला. चौकशीत त्याने आपल्या साथीदारांसह सारंगखेडा परिसरात अनेक घरफोड्या केल्याची कबुली दिली.पोलिसांनी आरोपीकडून सुरुवातीला 5 लाख 83 हजार 50 रुपयांचे सोन्याचे दागिने व गुन्ह्यात वापरलेली मोटारसायकल असा 6 लाख 83 हजार 50 रुपयांचा मुद्देमाल जप्त केला. त्यानंतर त्याचे साथीदार रतला मालसिंग तडवी आणि जगदिश प्रताप तडवी यांना देखील ताब्यात घेण्यात आले.तिन्ही आरोपींकडून एकूण 99.61 ग्रॅम वजनाचे 14 लाख 94 हजार 150 रुपयांचे सोन्याचे दागिने, 1 लाख 39 हजार 899 रुपयांचे चांदीचे दागिने आणि 1 लाख रुपयांची मोटारसायकल असा एकूण 17 लाख 34 हजार 49 रुपयांचा मुद्देमाल हस्तगत करण्यात आला.या कारवाईमुळे सारंगखेडा पोलीस ठाण्यातील गु.र.नं. 110/2026, 125/2026, 157/2026 आणि 160/2026 असे चार घरफोडीचे गुन्हे उघडकीस आले आहेत.ही उल्लेखनीय कामगिरी नंदुरबार जिल्ह्याचे पोलीस अधीक्षक श्रीमती अश्विनी सानप, अपर पोलीस अधीक्षक श्री. अशित कांबळे यांचे मार्गदर्शनाखाली स्थानिक गुन्हे शाखेचे पोलीस निरीक्षक श्री. हेमंत पाटील, सपोनि/स्वप्नील वाळके, पोलीस उप निरीक्षक श्री. मुकेश पवार, विकास गुंजाळ, पोलीस हवालदार सुनिल येलवे, दादाभाई वाघ, ज्ञानेश्वर पाटील, सचिन वसावे, संजय रामोळे, पोलीस नाईक अविनाश चव्हाण चेतन साळवे, पोलीस अंमलदार अभय राजपुत, सारंगखेडा पोलीस ठाण्याचे सहा. पोलीस निरीक्षक श्री. रविंद्र बागुल, पोलीस उप निरीक्षक श्री. किरण बाहे, पोलीस हवालदार मन्साराम पाटील, अंमलदार प्रविण लोहार, वसंत मारनर व मालमत्तेविरुध्द् तपास पथकाचे पोलीस उप निरीक्षक दत्तात्रय पोटे, पोलीस अंमलदार इम्रान खाटीक, शिवदास पारधी, समाधान बोरसे, अनिल बढे, मधुकर वाडीले यांचे पथकाने केली आहे.