🤝 जुन्या आठवणींना उजाळा, मैत्रीचे बंध अधिक घट्ट; 2005 च्या विद्यार्थ्यांचा अविस्मरणीय मेळावा

नगाव : दि. ८ जून : “शाळा संपली, पण मैत्री नाही” याचा प्रत्यय देणारा इयत्ता दहावी सन 2005 च्या विद्यार्थ्यांचा भव्य गेट-टुगेदर कार्यक्रम रविवार, दि. 7 जून 2026 रोजी मोठ्या आनंद, उत्साह आणि भावनिक वातावरणात पार पडला.आण्णासाहेब द. वा. पाटील माध्यमिक व उच्च माध्यमिक विद्यालय, नगाव येथील सन 2005 च्या दहावीच्या विद्यार्थ्यांनी तब्बल 21 वर्षांनंतर एकत्र येत जुन्या आठवणींना उजाळा दिला. गंगामाई प्राथमिक शाळा, जिल्हा परिषद शाळा आणि त्यानंतर माध्यमिक विद्यालयात एकत्र शिक्षण घेतलेल्या मित्र-मैत्रिणींनी पुन्हा एकदा शालेय जीवन अनुभवले.कार्यक्रमाची सुरुवात सर्वांनी आपल्या जुन्या वर्गात जाऊन केली. शाळेतील बाक, वर्गखोली, मैदान आणि प्रत्येक कोपऱ्याशी निगडित आठवणींना उजाळा देताना अनेकांच्या चेहऱ्यावर आनंद आणि भावुकतेचे भाव उमटले. विद्यार्थ्यांनी त्यांना शिक्षण देणाऱ्या शिक्षक-शिक्षिकांची कृतज्ञतेने आठवण काढली. पी.टी.च्या तासातील खेळ, वर्गातील खोड्या, अभ्यासातील स्पर्धा, डब्यातील खाऊची देवाण-घेवाण आणि शालेय जीवनातील अनेक रम्य प्रसंगांवर मनमोकळ्या गप्पा रंगल्या.यानंतर मोराणे येथील सुवर्ण स्पर्श रेस्टॉरंटमध्ये विविध मनोरंजनात्मक कार्यक्रमांचे आयोजन करण्यात आले. सर्वप्रथम नाश्त्याचा आस्वाद घेतल्यानंतर प्रत्येकाने स्वतःचा परिचय करून देत गेल्या 21 वर्षांतील जीवनप्रवास उलगडला. काही जण शासकीय सेवेत, काही पोलीस व सैन्य दलात, काही अधिकारी म्हणून कार्यरत आहेत, तर अनेक जण व्यवसाय, व्यापार आणि शेती क्षेत्रात यशस्वीपणे कार्यरत असल्याचे यावेळी समोर आले.कार्यक्रमात रस्सीखेच, संगीत खुर्ची, गाणी, कविता, बोधकथा आणि विविध मनोरंजनात्मक स्पर्धांनी रंगत आणली. मित्र-मैत्रिणींनी आपल्या कला सादर करत उपस्थितांचे मन जिंकले. दिवसभर हशा, आनंद, आठवणी आणि भावनिक क्षणांनी वातावरण भारावून गेले होते.

“ज्या शाळेने घडवले, ज्या शिक्षकांनी मार्गदर्शन केले आणि ज्या मित्रांसोबत बालपण व्यतीत केले, त्यांच्यासोबत पुन्हा एकदा वेळ घालवण्याचा हा क्षण आयुष्यातील अविस्मरणीय ठेवा आहे,” अशी भावना अनेकांनी व्यक्त केली.पहिल्यांदाच आयोजित करण्यात आलेला हा गेट-टुगेदर कार्यक्रम सर्वांच्या मनात कायमस्वरूपी आठवण बनून राहिला. 21 वर्षांनंतर झालेल्या या स्नेहमेळाव्याने मैत्रीचे बंध अधिक दृढ करत जुन्या आठवणींना नवसंजीवनी दिली.