🚨 नरडाणा पोलिसांची धडाकेबाज कारवाई; घरफोडी करणारी टोळी जेरबंद, 2.76 लाखांचा मुद्देमाल जप्त!

धुळे | प्रतिनिधी

शिंदखेडा तालुक्यातील डाबली, मेलाणे आणि नरडाणा परिसरात घरफोडी व चोरीच्या घटनांनी नागरिकांमध्ये भीतीचे वातावरण निर्माण झाले असताना नरडाणा पोलिसांनी अत्यंत कौशल्यपूर्ण तपास करत घरफोडी करणाऱ्या टोळीचा पर्दाफाश केला आहे. या कारवाईत 3 आरोपी व 1 विधी संघर्षग्रस्त बालकाला ताब्यात घेण्यात आले असून त्यांच्या ताब्यातून तब्बल 2 लाख 76 हजार रुपयांचा मुद्देमाल जप्त करण्यात आला आहे.दि. 6 जून 2026 रोजी मध्यरात्री डाबली येथील अरुण मुरलीधर पाटील यांच्या घरात अज्ञात चोरट्यांनी प्रवेश करून लोखंडी कपाटातील सोन्याचे दागिने, रोख रक्कम, बेन्टेक्स पोत व मोबाईल असा सुमारे 74 हजार रुपयांचा ऐवज चोरून नेला होता. याप्रकरणी नरडाणा पोलीस ठाण्यात गुन्हा दाखल करण्यात आला होता.गुन्ह्याचा तपास सुरू असताना नरडाणा पोलीस ठाण्याचे प्रभारी अधिकारी सपोनि. निलेश मोरे यांना मिळालेल्या गोपनीय माहितीच्या आधारे संशयितांना ताब्यात घेण्यात आले. सखोल चौकशीत आरोपींनी डाबली, मेलाणे आणि नरडाणा परिसरात घरफोडी केल्याची तसेच हातचलाखीने सहा मोबाईल चोरी केल्याची कबुली दिली.आरोपींकडून रोख रक्कम, सोन्याचे दागिने, बेन्टेक्स पोत, विविध कंपन्यांचे मोबाईल तसेच चोरीसाठी वापरलेली अंदाजे 1 लाख रुपये किमतीची बजाज पल्सर मोटारसायकल असा एकूण 2 लाख 76 हजार रुपयांचा मुद्देमाल हस्तगत करण्यात आला आहे.या कारवाईमुळे नरडाणा पोलीस ठाण्यातील घरफोडीचे दोन गुन्हे उघडकीस आले असून परिसरातील नागरिकांनी पोलिसांच्या कामगिरीचे कौतुक केले आहे.

ही उल्लेखनीय कारवाई पोलीस अधीक्षक विशाल आनंद, अपर पोलीस अधीक्षक अजय देवरे आणि उपविभागीय पोलीस अधिकारी विश्वजित जाधव यांच्या मार्गदर्शनाखाली नरडाणा पोलीस ठाण्याचे प्रभारी अधिकारी निलेश मोरे,पोउनि. रविंद्र महाले, पोउनि. विजय पाटील, पोउनि. रविंद्र शिंदे आणि पोलीस अंमलदार ललीत पाटील, राकेश शिरसाठ, गणेश पाटील, नारायण गवळी, भरत चव्हाण, योगेश गिते, अनारसिंग पवार, धनेश कुंकारी, रविंद्र मोराणीस, विक्रांत देसले, चंद्रकांत साळुंखे, विजय माळी, विनोद कोळी, प्रशांत पाटील, सचिन बागुल, अनिल सोनवणे, भरत भगरे, सुनिल पगारे, सुरजकुमार सावळे व होमगार्ड जितेंद्र रणदिवे यांनी यशस्वीरीत्या पार पाडली.