🚨 श्रीरामपूर तालुक्यातील घरफोडी प्रकरणाचा पर्दाफाश; दोन सराईत आरोपी जेरबंद, 6.90 लाखांचा मुद्देमाल जप्त

श्रीरामपूर (प्रतिनिधी) :

श्रीरामपूर तालुका पोलीस स्टेशन हद्दीतील घरफोडी चोरीच्या गुन्ह्याचा स्थानिक गुन्हे शाखा (LCB) अहिल्यानगरच्या पथकाने यशस्वी छडा लावत दोन सराईत आरोपींना अटक केली असून त्यांच्या ताब्यातून तब्बल 6 लाख 90 हजार रुपयांचा मुद्देमाल जप्त करण्यात आला आहे. या कारवाईमुळे परिसरातील घरफोडीच्या घटनांबाबत नागरिकांमध्ये निर्माण झालेली भीती काही प्रमाणात कमी झाली आहे.प्राप्त माहितीनुसार, वांगी बुद्रुक येथील रहिवासी सोपान चंद्रभान थोरात हे 16 मे 2026 रोजी दुपारच्या सुमारास घराजवळील वस्तीवर जेवणासाठी गेले असताना अज्ञात चोरट्यांनी त्यांच्या घराचे कुलूप तोडून कपाटातील सोन्याचे दागिने व रोख रक्कम असा सुमारे 4 लाख 6 हजार रुपयांचा ऐवज लंपास केला होता. याप्रकरणी श्रीरामपूर तालुका पोलीस ठाण्यात गुन्हा दाखल करण्यात आला होता.या गंभीर गुन्ह्याची दखल घेत पोलीस अधीक्षक मुम्मका सुदर्शन यांनी आरोपींना तात्काळ जेरबंद करण्याचे आदेश दिले. त्यानुसार पोलीस निरीक्षक किरणकुमार कबाडी यांच्या नेतृत्वाखाली स्थानिक गुन्हे शाखेचे विशेष पथक तयार करण्यात आले.तपासादरम्यान पथकाने तांत्रिक माहिती, गुप्त बातमीदारांचे जाळे आणि व्यावसायिक कौशल्याच्या आधारे आरोपींचा शोध सुरू ठेवला. याच दरम्यान गुप्त माहिती मिळाल्यानंतर पथकाने घोडेगाव ते शनी शिंगणापूर मार्गावर सापळा रचला. पोलिसांची चाहूल लागताच संशयितांनी पळ काढण्याचा प्रयत्न केला; मात्र पोलिसांनी पाठलाग करून त्यांना ताब्यात घेतले.अटक करण्यात आलेल्या आरोपींची नावे स्वरूप उर्फ गुंड्या डिस्चार्ज काळे (वय 30) आणि दर्या परांड्या भोसले (वय 35) अशी असून दोघेही अंतापूर, ता. गंगापूर, जि. छत्रपती संभाजीनगर येथील रहिवासी आहेत.सखोल चौकशीत आरोपींनी गुन्ह्याची कबुली दिली. त्यांच्या ताब्यातून 50 ग्रॅम वजनाची 6.50 लाख रुपये किंमतीची सोन्याची लगड तसेच 40 हजार रुपये किंमतीची मोटारसायकल असा एकूण 6.90 लाख रुपयांचा मुद्देमाल जप्त करण्यात आला.तपासादरम्यान आरोपींकडून आणखी एका घरफोडीच्या गुन्ह्याचीही उकल झाली असून एकूण दोन गुन्हे उघडकीस आणण्यात पोलिसांना यश आले आहे.आरोपींना पुढील तपासासाठी श्रीरामपूर तालुका पोलिसांच्या ताब्यात देण्यात आले असून अधिक तपास सुरू आहे.ही उल्लेखनीय कारवाई पोलीस अधीक्षक मुम्मका सुदर्शन यांच्या मार्गदर्शनाखाली पो.नि. किरणकुमार कबाडी, पोउपनि. संदीप मुरकुटे, रिचर्ड गायकवाड, भगवान थोरात, रमीजराजा आत्तार, विशाल तनपुरे आणि चालक अरुण मोरे यांच्या पथकाने यशस्वीरीत्या पार पाडली.