🚨 कोपरगाव-राहुरीत अवैध वाळू माफियांवर LCB चा मोठा प्रहार; १६.४० लाखांचा मुद्देमाल जप्त, ४ आरोपींवर गुन्हे दाखल!

अहिल्यानगर | प्रतिनिधी

जिल्ह्यातील अवैध वाळू उपसा आणि वाहतुकीविरोधात स्थानिक गुन्हे शाखेने (LCB) पुन्हा एकदा धडक कारवाई करत वाळू माफियांचे धाबे दणाणून सोडले आहेत. कोपरगाव तालुका आणि राहुरी पोलीस स्टेशन हद्दीत पहाटेच्या सुमारास टाकलेल्या छाप्यांमध्ये अवैधरित्या वाळूची वाहतूक करणाऱ्या वाहनांवर कारवाई करून तब्बल १६ लाख ४० हजार रुपयांचा मुद्देमाल जप्त करण्यात आला असून ४ आरोपींविरुद्ध गुन्हे दाखल करण्यात आले आहेत.जिल्ह्यात वाढत असलेल्या अवैध वाळू उपशामुळे पर्यावरणाची मोठ्या प्रमाणावर हानी होत असून शासनाच्या महसुलालाही कोट्यवधी रुपयांचा फटका बसत आहे. या पार्श्वभूमीवर पोलीस अधीक्षक श्री. मुम्मका सुदर्शन यांनी अवैध वाळू वाहतूक करणाऱ्यांविरोधात कठोर कारवाईचे आदेश दिले होते. त्यानुसार स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली विशेष पथके तयार करून गुप्त माहितीच्या आधारे ही कारवाई करण्यात आली.

पोउपनि दिपक मेढे, संदीप मुरकुटे तसेच पोलीस अंमलदार विजय पवार, बाळासाहेब गुंजाळ, सुनिल मालणकर, भगवान थोरात, विशाल तनपुरे आणि चालक अरुण मोरे यांच्या पथकांनी ११ जून २०२६ रोजी पहाटे कोपरगाव व राहुरी परिसरात सापळा रचला. यावेळी अवैधरित्या वाळूची वाहतूक करणाऱ्या वाहनांची तपासणी करण्यात आली.

कोपरगाव तालुक्यातील कारवाई

कोपरगाव तालुका पोलीस स्टेशन हद्दीत अवैध वाळू वाहतूक करताना येडू गुलाब इंगळे (वय ३०, रा. सवंत्सर, ता. कोपरगाव) यास ताब्यात घेण्यात आले. त्याच्याकडून सुमारे १२ लाख २० हजार रुपयांचा मुद्देमाल, त्यामध्ये वाहन व अंदाजे २ ब्रास वाळू जप्त करण्यात आली. याप्रकरणी भारतीय न्याय संहिता २०२३ च्या कलम ३०३ (२) अंतर्गत गुन्हा दाखल करण्यात आला आहे.

राहुरीतही कारवाईचा बडगा

राहुरी पोलीस स्टेशन हद्दीतही अवैध वाळू वाहतुकीचा पर्दाफाश करत विकास राजेंद्र ठोकळे (वय २३, माळी गल्ली, राहुरी), काळू गुंजाळ (रा. मुलनमाथा, राहुरी) आणि प्रतिक बोबडे (रा. राजवाडा, राहुरी) यांच्याविरुद्ध गुन्हा दाखल करण्यात आला. या कारवाईत ४ लाख २० हजार रुपयांचा मुद्देमाल आणि अंदाजे २ ब्रास वाळू जप्त करण्यात आली. याप्रकरणी भारतीय न्याय संहिता २०२३ च्या कलम ३०३ (२) व ३ (५) अन्वये गुन्हा नोंदविण्यात आला आहे.

अवैध वाळू माफियांना स्पष्ट इशारा

या दोन स्वतंत्र कारवायांमध्ये एकूण २ गुन्हे दाखल, ४ आरोपींवर कारवाई आणि १६ लाख ४० हजार रुपयांचा मुद्देमाल जप्त करण्यात आला आहे. स्थानिक गुन्हे शाखेच्या या धडक मोहिमेमुळे अवैध वाळू माफियांचे चांगलेच धाबे दणाणले असून जिल्ह्यातील अवैध धंदे करणाऱ्यांना स्पष्ट इशारा मिळाला आहे.पोलीस प्रशासनाने यापुढेही अवैध वाळू उपसा, वाहतूक आणि साठेबाजी करणाऱ्यांविरुद्ध सातत्याने कठोर कारवाई सुरू राहणार असल्याचे स्पष्ट केले आहे.पोलीस अधीक्षक श्री. मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने ही उल्लेखनीय कारवाई यशस्वीरीत्या पार पाडली.