🚨 प्लंबरनेच फोडले घर! विश्वासाला तडा देत साथीदारांसह केली लाखोंची चोरी; LCB धुळेची धडाकेबाज कारवाई, 15 लाखांचा मुद्देमाल हस्तगत

धुळे/प्रतिनिधी

धुळे शहरातील एका घरफोडी प्रकरणाचा स्थानिक गुन्हे शाखेने (LCB) अवघ्या काही दिवसांत छडा लावत मुख्य आरोपीला अटक करून जवळपास 14 लाख 97 हजार 700 रुपयांचा मुद्देमाल हस्तगत केला आहे. विशेष म्हणजे घरात प्लंबिंगचे काम करणाऱ्या व्यक्तीनेच घराची माहिती मिळवून साथीदारांच्या मदतीने चोरी केल्याचे तपासात निष्पन्न झाले आहे.धुळे येथील वैद्यनगर परिसरात राहणारे फिर्यादी राम मोहनलाल हरवाणी यांच्या घराचे नूतनीकरण सुरू होते. त्या ठिकाणी प्लंबिंगचे काम करणारा आरोपी राजेश ऊर्फ भटू धरणीधर सहाणी हा घरातील हालचाली, मौल्यवान वस्तू आणि सुरक्षा व्यवस्थेची माहिती घेत होता. काम पूर्ण करून गेल्यानंतर 31 मे रोजी रात्रीच्या सुमारास त्याने आपल्या साथीदारांसह घरात प्रवेश करून सोन्या-चांदीचे दागिने आणि इतर मौल्यवान वस्तूंवर हात साफ केला.दुसऱ्या दिवशी घरमालकांना चोरीचा प्रकार लक्षात आल्यानंतर धुळे शहर पोलीस ठाण्यात भारतीय न्याय संहिता (BNS) कलम 331(3), 331(4) व 305 अन्वये गुन्हा दाखल करण्यात आला.तपासादरम्यान स्थानिक गुन्हे शाखेचे पोलीस निरीक्षक अभिजीत सोनवणे यांना गोपनीय माहिती मिळाली की मुख्य आरोपी चोरीचा काही मुद्देमाल विक्री करण्याच्या तयारीत चक्करबर्डी येथील पाण्याच्या टाकीजवळ थांबला आहे. त्यानुसार पोउनि. अमित माळी यांच्या नेतृत्वाखाली पथकाने सापळा रचून आरोपीला ताब्यात घेतले.चौकशीत आरोपीने गुन्ह्याची कबुली देत आपल्या तीन साथीदारांची नावे उघड केली. तसेच चोरी केलेले काही दागिने स्वतःकडे तर उर्वरित साथीदारांकडे असल्याचे सांगितले. आरोपीकडून सोन्या-चांदीचे दागिने, बांगड्या, मंगळसूत्र, अंगठ्या, कानातील टॉप्स, पैंजण, ब्रेसलेट, नाणी तसेच गुन्ह्यात वापरण्यात आलेली होंडा शाईन मोटारसायकल असा एकूण 14,97,700 रुपयांचा मुद्देमाल जप्त करण्यात आला.तपासात उघड झाले की आरोपीने घरात काम करत असतानाच घराची रेकी केली होती. घरातील मौल्यवान वस्तू कुठे ठेवलेल्या आहेत, घरातील सदस्यांची ये-जा आणि परिसराची माहिती मिळवून त्याने चोरीचा कट रचला.सध्या मुख्य आरोपी पोलिसांच्या ताब्यात असून त्याचे तीन साथीदार फरार आहेत. त्यांच्या अटकेसाठी स्थानिक गुन्हे शाखेकडून शोधमोहीम सुरू आहे.ही उल्लेखनीय कारवाई पोलीस अधीक्षक विशाल आनंद व अपर पोलीस अधीक्षक अजय देवरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अभिजीत सोनवणे, सपोनि. नामदेव सहारे, पोउनि. अमित माळी तसेच त्यांच्या पथकाने यशस्वीरित्या पार पाडली.

विशेष

या प्रकरणामुळे घरामध्ये कामासाठी येणाऱ्या कामगारांची संपूर्ण पडताळणी करणे, त्यांची ओळखपत्रे व मोबाईल क्रमांक नोंदवून ठेवणे आणि मौल्यवान वस्तूंबाबत सावधगिरी बाळगणे किती आवश्यक आहे, हे पुन्हा अधोरेखित झाले आहे.