🚨 आंतरराज्यीय घरफोडी टोळीचा शिरपूर शहर पोलिसांकडून पर्दाफाश; मध्यप्रदेशातील तिघे जेरबंद, दोन घरफोडीचे गुन्हे उघड, चोरीचे सोने-चांदी हस्तगत

शिरपूर | प्रतिनिधी

शिरपूर शहर परिसरात घडलेल्या घरफोडीच्या दोन गंभीर गुन्ह्यांचा यशस्वी छडा लावत शिरपूर शहर पोलिसांनी आंतरराज्यीय घरफोडी करणाऱ्या टोळीचा पर्दाफाश केला आहे. मध्यप्रदेशातील बडवाणी जिल्ह्यातील सेंधवा येथील तिघा सराईत आरोपींना अटक करून त्यांच्याकडून ₹1 लाख 6 हजार 550 किमतीचा चोरीतील सोने-चांदीचा मुद्देमाल हस्तगत करण्यात आला असून, शिरपूर शहर पोलीस ठाण्यात दाखल असलेल्या दोन घरफोडीच्या गुन्ह्यांची उकल करण्यात पोलिसांना यश आले आहे.पोलिसांनी दिलेल्या माहितीनुसार, दि. 12 मे 2026 रोजी नवे अंतुर्ली (ता. शिरपूर) येथील रहिवासी विलास देविदास ईशी हे कुटुंबासह घराच्या स्लॅबवर झोपले असताना अज्ञात चोरट्यांनी त्यांच्या घरात प्रवेश करून ₹44 हजार 550 किमतीचे सोने-चांदीचे दागिने चोरून नेले. याप्रकरणी शिरपूर शहर पोलीस ठाण्यात गुन्हा क्रमांक 206/2026 अंतर्गत भारतीय न्याय संहिता (BNS) कलम 305(अ) व 331(4) अन्वये गुन्हा दाखल करण्यात आला.गुन्ह्याचे गांभीर्य लक्षात घेऊन शिरपूर शहर पोलीस ठाण्याचे प्रभारी अधिकारी व पोलीस निरीक्षक किशोरकुमार परदेशी यांनी विशेष तपास पथक स्थापन करून तपासाला गती दिली. तपासादरम्यान नंदुरबार जिल्ह्यातील सारंगखेडा पोलीस ठाण्यातील गुन्हा क्रमांक 160/2026 मधील अटकेत असलेल्या आरोपींचा या घरफोडीशी संबंध असल्याची माहिती मिळाली. त्यानुसार आरोपींना ट्रान्सफर वॉरंटवर ताब्यात घेऊन चौकशी करण्यात आली.सखोल चौकशीत मिठाराम भावसिंग तडवी (वय 35), रतला मालसिंग मेहडे (वय 31) आणि जगदीश प्रताप किराडे (वय 32), सर्व रा. आंबासुका, ता. सेंधवा, जि. बडवाणी (मध्यप्रदेश) यांनी नवे अंतुर्ली येथील घरफोडीची कबुली दिली. चोरीतील दागिने त्यांनी सेंधवा येथील किशोर मोतीलाल सोनी ज्वेलर्स यांना विकल्याचे सांगितले. त्यानुसार पोलिसांनी मध्यप्रदेशात जाऊन संबंधित सराफाकडून 14 ग्रॅम सोन्याची लगड व 55 ग्रॅम चांदीची लगड जप्त केली.चौकशीदरम्यान आरोपींनी दि. 14 मे 2026 रोजी शिरपूर तालुक्यातील बोरगाव येथे आणखी एक घरफोडी केल्याचीही कबुली दिली. या प्रकरणी शिरपूर शहर पोलीस ठाण्यात गुन्हा क्रमांक 211/2026 दाखल असल्याची खात्री करून पोलिसांनी शांतीलालजी सोनी ज्वेलर्स, सेंधवा यांच्याकडून 10 ग्रॅम सोन्याची लगड तसेच 1020 ग्रॅम वजनाची दोन चांदीची बिस्किटे व एक चांदीची लगड जप्त केली.या कारवाईत पोलिसांनी एकूण ₹1,06,550 किमतीचा चोरीतील मुद्देमाल हस्तगत केला असून, त्यामध्ये सोन्याच्या दोन लगडी, चांदीची लगड आणि दोन चांदीची बिस्किटे यांचा समावेश आहे. आरोपींनी चोरीनंतर दागिने वितळवून त्यांची लगड तयार करून पुरावे नष्ट करण्याचा प्रयत्न केला होता. मात्र शिरपूर शहर पोलिसांच्या तांत्रिक तपास, गुप्त माहिती आणि सातत्यपूर्ण चौकशीमुळे हा प्रयत्न निष्फळ ठरला.या कारवाईमुळे शिरपूर शहर पोलीस ठाण्यातील गुन्हा क्र. 206/2026 आणि गुन्हा क्र. 211/2026 अशा दोन घरफोडीच्या गुन्ह्यांची उकल झाली असून, आरोपींकडून आणखी काही गुन्ह्यांची माहिती समोर येण्याची शक्यता असल्याने पुढील तपास सुरू आहे.ही उल्लेखनीय कारवाई पोलीस अधीक्षक विशाल आनंद, अपर पोलीस अधीक्षक, तसेच उपविभागीय पोलीस अधिकारी विश्वजीत जाधव यांच्या मार्गदर्शनाखाली पार पडली. या संपूर्ण कारवाईत शिरपूर शहर पोलीस ठाण्याचे पोलीस निरीक्षक किशोरकुमार परदेशी, पोलीस उपनिरीक्षक हेमंत खैरनार, तसेच पोलीस अंमलदार रविंद्र आखडमल, अतुल पाटील,गोविंद कोळी, विनोद आखडमल, आरीफ तडवी, मनोज महाजन, सचिन वाघ, योगेश दाभाडे, भटू साळुंखे, सोमा ठाकरे, मनोज दाभाडे, प्रशांत पवार आणि होमगार्ड मिथुन पवार यांनी विशेष परिश्रम घेत ही यशस्वी कामगिरी बजावली.भारतीय न्याय संहिता (BNS) कलम 305(अ) व 331(4) अंतर्गत दाखल या गुन्ह्यांमध्ये आरोपींविरुद्ध पुढील न्यायालयीन प्रक्रिया सुरू असून, या आंतरराज्यीय टोळीच्या इतर गुन्ह्यांचाही तपास शिरपूर शहर पोलीस करत आहेत.