🚨 मुंगसेतील कथित अघोरी जादूटोणा प्रकरणाचा मोठा पर्दाफाश; इला फार्मवर पोलिसांचा मध्यरात्री छापा, ९ संशयित अटकेत, एक फरार

मालेगाव प्रतिनिधी |

नाशिक जिल्ह्यातील मालेगाव तालुक्यातील मुंगसे गावातील इला फार्म येथे कथित अघोरी जादूटोणा सुरू असल्याच्या गुप्त माहितीवरून मालेगाव तालुका पोलिसांनी केलेल्या धडक कारवाईत मोठा पर्दाफाश झाला आहे. मध्यरात्री टाकण्यात आलेल्या छाप्यात विविध ठिकाणांहून आलेल्या ९ संशयितांना अटक करण्यात आली असून, एक संशयित घटनास्थळावरून फरार झाल्याची माहिती समोर आली आहे. या प्रकरणामुळे संपूर्ण परिसरात मोठी खळबळ उडाली असून पोलिसांनी तपासाची व्याप्ती वाढवली आहे.पोलिस सूत्रांकडून मिळालेल्या माहितीनुसार, गुरुवार (दि. २५ जून) रोजी रात्री उशिरा इला फार्म परिसरात काही व्यक्ती अघोरी स्वरूपाचे विधी करत असल्याची गोपनीय माहिती पोलिसांना मिळाली होती. माहितीची खातरजमा केल्यानंतर वरिष्ठ अधिकाऱ्यांच्या मार्गदर्शनाखाली विशेष पथक तयार करण्यात आले. त्यानंतर कोणतीही पूर्वसूचना न देता घटनास्थळी छापा टाकण्यात आला.छाप्यादरम्यान पोलिसांना कथित जादूटोण्याच्या विधींमध्ये वापरले जात असल्याचा संशय असलेले विविध साहित्य आढळून आले. यामध्ये लिंबू, हिरवा कपडा, हळदीचे कुंड, लाल व काळ्या धाग्यात ओवलेले लिंबू, काळे मूग, उद, राई तसेच इतर पूजाविधीचे साहित्य जप्त करण्यात आले. या साहित्याची पुढील तपासासाठी नोंद करण्यात आली असून त्याची शास्त्रीय आणि कायदेशीर पडताळणी केली जाणार आहे.या कारवाईत ताब्यात घेण्यात आलेल्या संशयितांमध्ये मालेगाव, कलेक्टर पट्टा, मुंगसे, नाशिक, पुणे, नांदगाव आणि साकुरी येथील व्यक्तींचा समावेश असल्याचे पोलिसांनी सांगितले. सर्व संशयितांविरुद्ध महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायद्यान्वये गुन्हा दाखल करण्यात आला आहे.कारवाईदरम्यान एक संशयित पोलिसांची चाहूल लागताच घटनास्थळावरून पसार झाला. त्याचा शोध घेण्यासाठी स्वतंत्र पथके रवाना करण्यात आली असून त्याची ओळख निश्चित करण्याचे काम सुरू आहे. फरार संशयिताला लवकरच अटक करण्यात येईल, असा विश्वास पोलिसांनी व्यक्त केला आहे.अटक करण्यात आलेल्या सर्व संशयितांना मालेगाव न्यायालयात हजर करण्यात आले. दोन्ही बाजूंचा युक्तिवाद ऐकल्यानंतर न्यायालयाने रविवारीपर्यंत पोलिस कोठडी सुनावली. या कालावधीत संशयितांची चौकशी करून या प्रकरणात आणखी कोणी सहभागी होते का, आर्थिक व्यवहार झाले होते का, तसेच अशा प्रकारचे विधी यापूर्वीही झाले होते का, याचा तपास केला जाणार आहे.या घटनेमुळे मुंगसे आणि परिसरात विविध चर्चांना उधाण आले असून, अंधश्रद्धेला खतपाणी घालणाऱ्या अशा कथित प्रकारांवर कठोर कारवाई व्हावी, अशी मागणी सामाजिक स्तरातून व्यक्त होत आहे. पोलिसांनी मात्र नागरिकांनी अफवांवर विश्वास न ठेवता अधिकृत माहितीवरच विश्वास ठेवण्याचे आवाहन केले आहे.