🔥 अंतर्गत वादातून हल्ल्याची तयारी; स्थानिक गुन्हे शाखेची धडक कारवाई

धुळे | प्रतिनिधी

धुळे शहरात अंतर्गत वादातून घडू शकणारा संभाव्य रक्तरंजित हल्ला स्थानिक गुन्हे शाखेच्या सतर्कतेमुळे वेळेतच हाणून पाडण्यात आला. गुप्त माहितीच्या आधारे केलेल्या धाडसी कारवाईत एका संशयिताला विना परवाना गावठी कट्टा (पिस्टल), चार जिवंत काडतुसे आणि चारचाकी वाहनासह अटक करण्यात आली. या कारवाईमुळे शहरात घडू शकणारा गंभीर गुन्हा टळल्याची चर्चा सुरू आहे.मा. विशेष पोलीस महानिरीक्षक, नाशिक परिक्षेत्र तसेच मा. पोलीस अधीक्षक, धुळे यांच्या मार्गदर्शनाखाली जिल्ह्यात अवैध शस्त्रांविरोधात विशेष मोहीम राबविण्यात येत आहे. त्याच मोहिमेअंतर्गत स्थानिक गुन्हे शाखेचे पोलीस निरीक्षक ज्ञानेश्वर वारे यांना मिळालेल्या गोपनीय माहितीवरून ही यशस्वी कारवाई करण्यात आली.दि. २७ जून २०२६ रोजी पोलिसांनी सापळा रचून सुमित सुभाष शिंदे (वय ३६, रा. सतीश नगर, देवपूर, धुळे) याला ताब्यात घेतले. आरोपी हा सुझुकी बलेनो (MH-18/BR-9103) या कारमधून पांझरा नदीकाठी असलेल्या संत रोहिदास गार्डन परिसरातून जात असताना पोलिसांनी वाहन अडवून कसून झडती घेतली.झडतीदरम्यान आरोपीकडून एक गावठी कट्टा (पिस्टल), चार जिवंत काडतुसे आणि सुझुकी बलेनो कार असा एकूण ₹8 लाख 44 हजारांचा मुद्देमाल जप्त करण्यात आला.प्राथमिक चौकशीत हा कट्टा अंतर्गत वादातून हल्ला करण्याच्या उद्देशाने बाळगल्याचा संशय व्यक्त करण्यात आला असून, आरोपीकडे शस्त्र नेमके कुठून आले, त्यामागे आणखी कोणाचा सहभाग आहे का, तसेच यामध्ये इतर साथीदार आहेत का, याचा सखोल तपास स्थानिक गुन्हे शाखेकडून सुरू आहे.अवैध शस्त्रांविरोधातील या कारवाईमुळे धुळे पोलिसांनी संभाव्य गंभीर गुन्हा रोखत शहराच्या सुरक्षेच्या दृष्टीने महत्त्वाचे यश संपादन केले आहे.