🚨 अलिशान कारमधून गुटखा तस्करीचा मोठा पर्दाफाश; श्रीगोंद्यात स्थानिक गुन्हे शाखेची धडक कारवाई, ₹२८.८८ लाखांचा मुद्देमाल जप्त

सत्यध्येय एकविचार श्रीगोंदा | प्रतिनिधी :

अहिल्यानगर जिल्ह्यात अवैध गुटखा विक्री व वाहतुकीविरोधात स्थानिक गुन्हे शाखेने मोठी कारवाई करत श्रीगोंदा तालुक्यात अलिशान चारचाकी वाहनांमधून प्रतिबंधित गुटखा वाहतूक करणाऱ्या रॅकेटचा पर्दाफाश केला. या कारवाईत तीन आरोपींना अटक करण्यात आली असून दोन चारचाकी वाहने, मोठ्या प्रमाणातील गुटखा, रोख रक्कम व मोबाईल असा एकूण ₹२८ लाख ८८ हजार ३३० रुपयांचा मुद्देमाल जप्त करण्यात आला आहे. या प्रकरणातील चार आरोपी फरार असून त्यांचा शोध सुरू आहे.पोलीस अधीक्षक मुम्मका सुदर्शन यांनी जिल्ह्यातील अवैध धंद्यांचे समूळ उच्चाटन करण्याच्या सूचना दिल्यानंतर पोलीस निरीक्षक संतोष मुटकुळे यांच्या नेतृत्वाखाली पोलीस उपनिरीक्षक अनंत सालगुडे तसेच पोलीस अंमलदार अतुल लोटके, गणेश धोत्रे, शाहिद शेख, मनोज साखरे, प्रशांत राठोड आणि चंद्रकांत कुसळकर यांच्या पथकाने विशेष मोहीम राबविली.दि. २९ जून २०२६ रोजी श्रीगोंदा पोलीस ठाण्याच्या हद्दीत पेट्रोलिंग सुरू असताना गुप्त बातमीदारामार्फत मुंडेकरवाडी येथे अमोल जाधव हा प्रतिबंधित गुटखा व सुगंधी तंबाखूची विक्री करणार असल्याची माहिती पोलिसांना मिळाली. माहितीच्या आधारे पथकाने घटनास्थळी छापा टाकला असता पांढऱ्या रंगाच्या कारमधून दुसऱ्या कारमध्ये गोण्या भरत असलेले तीन जण आढळून आले. पोलिसांनी तात्काळ कारवाई करून अमोल रामदास जाधव (वय ३५), अनिल रतन कुरुमकर (वय ४३) आणि फरहान रेहमान बेपारी (वय २३) यांना ताब्यात घेतले.चौकशीत अमोल जाधव याने हा व्यवसाय दीपक लोखंडे (फरार) याच्यासोबत भागीदारीत चालवत असल्याची कबुली दिली. तसेच प्रतिबंधित माल जत (जि. सांगली) येथील अप्पू आणि माजीद (दोघेही फरार) यांच्याकडून खरेदी केल्याचे सांगितले. आरोपी फरहान बेपारी याने हा माल शोयेब राजू तांबोळी (फरार) यांच्या सांगण्यावरून विक्रीसाठी घेऊन जात असल्याची माहिती दिली.या कारवाईत ₹६,०३,२०० किमतीचा आरएमडी, विमल पान मसाला, गुटखा व सुगंधी तंबाखू, ₹२२ लाख किमतीच्या अल्काझार व स्विफ्ट या दोन चारचाकी गाड्या, ₹३०,१३० रोख रक्कम आणि ₹५५ हजार किमतीचे तीन मोबाईल असा एकूण ₹२८,८८,३३० रुपयांचा मुद्देमाल जप्त करण्यात आला.या प्रकरणी पोलीस अंमलदार मनोज मोहन साखरे यांच्या फिर्यादीवरून श्रीगोंदा पोलीस ठाण्यात गुन्हा क्रमांक ६४९/२०२६ दाखल करण्यात आला असून भारतीय न्याय संहिता २०२३ मधील कलम १२३, २२३, २७४, २७५, ३(५) तसेच अन्न सुरक्षा व मानके अधिनियम, २००६ मधील कलम ५९ अन्वये गुन्हा नोंदविण्यात आला आहे. पुढील तपास श्रीगोंदा पोलीस करीत आहेत.ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने यशस्वीरीत्या पार पाडली असून जिल्ह्यातील अवैध गुटखा तस्करीविरोधातील ही महत्त्वाची कारवाई मानली जात आहे.