🚨 ३० दुचाकी चोरीचा मोठा पर्दाफाश; मुक्ताईनगर पोलिसांची धडक कारवाई, दोन आरोपींसह दोन अल्पवयीन ताब्यात, ₹२५.८० लाखांचा मुद्देमाल जप्त

मुक्ताईनगर ( आकाश बेलदार ) प्रतिनिधी

जळगाव जिल्ह्यात वाढत्या वाहनचोरीच्या घटनांना आळा घालण्यासाठी पोलीस अधीक्षक मा. श्री. श्रीकांत धिवरे यांच्या आदेशानुसार मुक्ताईनगर पोलिसांनी राबविलेल्या विशेष मोहिमेत वाहनचोरी करणाऱ्या टोळीचा मोठा पर्दाफाश केला आहे. या कारवाईत दोन आरोपी व दोन अल्पवयीन संशयितांना ताब्यात घेऊन तब्बल ३० चोरीच्या मोटारसायकली जप्त करण्यात आल्या असून, जप्त मुद्देमालाची अंदाजे किंमत ₹२५ लाख ८० हजार रुपये आहे.मुक्ताईनगर पोलीस स्टेशन येथे दिनांक २६ जून २०२६ रोजी दाखल गुन्हा क्रमांक २७३/२०२६ (भारतीय न्याय संहिता, २०२३ चे कलम ३०३(२)) च्या तपासादरम्यान तांत्रिक माहितीचे विश्लेषण व गुप्त बातमीदारांकडून मिळालेल्या माहितीच्या आधारे पोलिसांनी विशाल सुरेश सोनवणे (रा. पिंपरूड, ता. यावल), कुंदन सुनील महाले (रा. सालबर्डी, ता. मुक्ताईनगर) तसेच वढवे व सालबर्डी येथील दोन अल्पवयीन संशयितांना ताब्यात घेतले.सखोल चौकशीत संशयितांनी सदर गुन्ह्यासह आणखी २९ मोटारसायकली चोरी केल्याची कबुली दिली. त्यानुसार पोलिसांनी विविध रेल्वे स्थानके व बसस्थानकांवरील ‘पे अँड पार्क’मधून एकूण ३० चोरीच्या मोटारसायकली जप्त केल्या. तपासात या मोटारसायकली महाराष्ट्रातील विविध जिल्हे तसेच गुजरात राज्यातील असल्याचे निष्पन्न झाले.प्राथमिक तपासात या वाहनचोरीचा संबंध गुजरात राज्यातील उधना (सुरत) पोलीस स्टेशन, तसेच कल्याण, नेरुळ, निफाड, वणी, इगतपुरी, गंगापूर, ओझर, सरकारवाडा, नेरळ, पारोळा, जिल्हापेठ आणि एरंडोल पोलीस ठाण्यांमध्ये दाखल असलेल्या वाहनचोरीच्या गुन्ह्यांशी असल्याचे समोर आले आहे.तपासादरम्यान आरोपींची कार्यपद्धतीही उघड झाली. आरोपी चोरी केलेल्या मोटारसायकली थेट विक्री न करता त्या रेल्वे स्टेशन किंवा बसस्थानकांवरील ‘पे अँड पार्क’मध्ये उभ्या करून तेथूनच ग्राहकांना विक्री करत असल्याचे निष्पन्न झाले आहे. या पद्धतीमुळे चोरीच्या वाहनांचा माग काढणे अवघड होत होते.ही उल्लेखनीय कारवाई मा. श्री. श्रीकांत धिवरे, पोलीस अधीक्षक, जळगाव, मा. श्री. संदीप गावीत, अपर पोलीस अधीक्षक, जळगाव, तसेच मा. श्री. केदार बारबोले, उपविभागीय पोलीस अधिकारी, मुक्ताईनगर यांच्या मार्गदर्शनाखाली पोलीस निरीक्षक आशिष आडसूळ यांच्या नेतृत्वात करण्यात आली.या कारवाईत पोहेकॉ. अजय खंडेराव, पोहेकॉ. महेंद्र सुरवाडे, पो.ना. असिम तडवी, पो.ना. कल्पेश आमोदकर, पो.अं. संदीप धनगर, पो.अं. सुनील मोरे, पो.अं. चेतन महाजन, पो.अं. रविंद्र धनगर, पो.अं. प्रशांत चौधरी, पो.अं. रमेश खोडपे, पो.अं. दीपक ढाकरे, पो.अं. स्वप्निल पवार आणि पो.अं. अक्षय वाढे यांनी मोलाची भूमिका बजावली.या कारवाईमुळे वाहनचोरी करणाऱ्या टोळीचे मोठे रॅकेट उघडकीस येण्याची शक्यता असून, आणखी गुन्हे उघड होण्याची शक्यता नाकारता येत नाही. या प्रकरणाचा पुढील तपास मुक्ताईनगर पोलीस करीत आहेत.