सत्यध्येय एकविचार शिंदखेडा | प्रतिनिधी
शिंदखेडा तालुक्यात कथितपणे सुरू असलेल्या बनावट देशी दारू निर्मितीच्या अड्ड्यावर शिंदखेडा पोलिसांनी धडक कारवाई करत तब्बल १५ लाख २१ हजार ७९६ रुपयांचा मुद्देमाल जप्त केला आहे. या कारवाईमुळे परिसरात सुरू असलेल्या कथित अवैध मद्यनिर्मितीच्या रॅकेटला मोठा धक्का बसला असून, संबंधितांविरुद्ध शिंदखेडा पोलीस ठाण्यात विविध कायदेशीर कलमान्वये गुन्हा दाखल करण्यात आला आहे.पोलिसांनी टाकलेल्या छाप्यात दारूच्या बाटल्यांवर लेबल व बुच बसविणारे ऑटोमॅटिक मशिन, आर.ओ. प्लांट, पाण्याच्या टाक्या, मोटार ग्राइंडर, स्पिरिटसदृश्य रसायने, विविध नामांकित कंपन्यांची संशयित बनावट लेबल्स, मोठ्या प्रमाणात रिकाम्या काचेच्या बाटल्या तसेच विक्रीसाठी तयार ठेवलेली कथित बनावट देशी दारू असा मोठा साठा जप्त केला. जप्त साहित्यावरून येथे मोठ्या प्रमाणात बनावट देशी दारूची निर्मिती करून ती बाजारात विक्रीसाठी पाठविण्याची तयारी सुरू असल्याचा प्राथमिक अंदाज व्यक्त केला जात आहे.प्राथमिक तपासात जप्त करण्यात आलेली कथित बनावट दारू मानवी आरोग्यास गंभीर धोका निर्माण करू शकणारी असल्याची माहिती पोलिसांनी दिली. अशा प्रकारच्या अवैध मद्यनिर्मितीमुळे नागरिकांच्या जीवितास धोका निर्माण होण्याबरोबरच शासनाचा महसूल बुडत असल्याने या प्रकरणाकडे गांभीर्याने पाहिले जात आहे.या प्रकरणी संबंधित आरोपीविरुद्ध शिंदखेडा पोलीस ठाण्यात विविध कायदेशीर कलमान्वये गुन्हा दाखल करण्यात आला असून, या अवैध मद्यनिर्मितीमागील मुख्य सूत्रधार, कच्चा माल पुरवठादार, बनावट लेबल पुरवणारे तसेच वितरण साखळीतील इतर संबंधितांचा शोध घेण्यासाठी पोलिसांनी तपासाची व्याप्ती वाढविली आहे. या रॅकेटशी संबंधित आणखी धक्कादायक बाबी तपासातून समोर येण्याची शक्यता व्यक्त केली जात आहे.ही उल्लेखनीय कारवाई पोलीस अधीक्षक विशाल आनंद, अपर पोलीस अधीक्षक अजय देवरे आणि उपविभागीय पोलीस अधिकारी सुधीर पाटील यांच्या मार्गदर्शनाखाली सहायक पोलीस निरीक्षक मयूर भामरे व शिंदखेडा पोलीस पथकाने केली. या कारवाईबद्दल पोलिसांच्या तत्परतेचे कौतुक होत असून, अवैध मद्यनिर्मिती व विक्रीविरोधातील मोहिम अधिक तीव्र करण्यात येणार असल्याचे संकेत मिळत आहेत.
