🚨 कुऱ्हाडीच्या घावांनी वृद्ध शेतकऱ्याचा अंत; १२ तासांत खून आरोपी जेरबंद

अहिल्यानगर | प्रतिनिधी

श्रीगोंदा तालुक्यातील पिसोरेखांड येथे घडलेल्या खळबळजनक वृद्ध शेतकरी खून प्रकरणाचा अवघ्या १२ तासांत उलगडा करण्यात स्थानिक गुन्हे शाखा, अहिल्यानगरला यश आले असून, फरार आरोपीला मढी परिसरातून शिताफीने ताब्यात घेण्यात आले आहे.प्राप्त माहितीनुसार, श्रीगोंदा पोलीस ठाण्याच्या हद्दीतील पिसोरेखांड गावात शेताच्या बांधावर मुरूम टाकण्याच्या किरकोळ वादातून ही रक्तरंजित घटना घडली. आरोपी विलास दादा गावडे (वय ५५, रा. पिसोरेखांड, ता. श्रीगोंदा) याने संतापाच्या भरात पोपटराव रावजी गावडे (वय ७५) या वृद्ध शेतकऱ्यावर कुऱ्हाडीने जीवघेणा हल्ला केला. डोक्यात गंभीर वार झाल्याने पोपटराव गावडे यांचा जागीच मृत्यू झाला.या प्रकरणी श्रीगोंदा पोलीस ठाण्यात गुन्हा रजिस्टर क्रमांक ५९५/२०२६ अन्वये भारतीय न्याय संहिता (BNS) २०२३ मधील कलम १०३, ३५२ व ३५१(२) अंतर्गत खुनाचा गंभीर गुन्हा दाखल करण्यात आला.घटनेचे गांभीर्य लक्षात घेऊन पोलीस अधीक्षक मुम्मका सुदर्शन यांनी स्थानिक गुन्हे शाखेचे प्रभारी अधिकारी हरिष भोये यांना आरोपीचा तातडीने शोध घेऊन अटक करण्याचे निर्देश दिले. त्यानुसार पोउपनि. संदीप मुरकुटे, अनंत सालगुडे, परिविक्षाधीन पोउपनि. पुष्कर कडू यांच्यासह अधिकारी व कर्मचाऱ्यांची दोन विशेष पथके तयार करण्यात आली.दरम्यान, आरोपी पोलिसांच्या हालचालींची माहिती घेत आपले अस्तित्व लपवून पाथर्डी तालुक्यातील मढी-मायंबा शिवार परिसरात आश्रय घेत असल्याची गोपनीय माहिती स्थानिक गुन्हे शाखेला मिळाली. या माहितीची खातरजमा करून पथकाने अत्यंत गोपनीय पद्धतीने शोधमोहीम राबवली.मढी गड परिसरात सापळा रचून पोलिसांनी आरोपी विलास गावडे याला शिताफीने ताब्यात घेतले. पोलिसांना चकवा देण्याचा त्याचा प्रयत्न निष्फळ ठरला आणि अवघ्या १२ तासांच्या आत आरोपी पोलिसांच्या जाळ्यात अडकला.ताब्यात घेतलेल्या आरोपीस पुढील तपासासाठी श्रीगोंदा पोलीस ठाण्याच्या स्वाधीन करण्यात आले असून त्यास विधीसंमत अटक करण्यात आली आहे. प्रकरणाचा पुढील तपास श्रीगोंदा पोलीस ठाण्याचे अधिकारी करीत आहेत.ही कारवाई पोलीस अधीक्षक मुम्मका सुदर्शन, अपर पोलीस अधीक्षक वैभव कलुबर्मे यांच्या मार्गदर्शनाखाली स्थानिक गुन्हे शाखेचे प्रभारी अधिकारी हरिष भोये व त्यांच्या पथकाने यशस्वीरित्या पार पाडली.