🚨 धुळे पोलीस प्रशिक्षण केंद्रात १.५५ कोटींचा महाघोटाळा; कायद्याचे धडे देणाऱ्या संस्थेतच शासकीय निधीची लूट!

सत्यध्येय एकविचार 

धुळे | प्रतिनिधी

धुळे शहरातील पोलीस प्रशिक्षण केंद्रात घडलेल्या तब्बल १ कोटी ५५ लाख रुपयांच्या शासकीय निधी अपहाराच्या प्रकरणामुळे संपूर्ण पोलीस प्रशासनात मोठी खळबळ उडाली आहे. कायद्याचे पालन आणि शिस्तीचे धडे दिल्या जाणाऱ्या संस्थेतच शासकीय निधीवर डल्ला मारल्याचा हा प्रकार अत्यंत गंभीर मानला जात असून, याप्रकरणी चार लोकसेवकांना अटक करण्यात आली आहे.प्राथमिक तपासानुसार, डिसेंबर २०२४ ते एप्रिल २०२६ या कालावधीत संबंधित आरोपींनी संगनमत करून शासनाच्या ‘सेवार्थ’ ऑनलाइन वेतन प्रणालीत बेकायदेशीर फेरफार केला. कोणत्याही प्रकारचे वेतन थकबाकी (Basic Arrears) मंजूर नसताना, खोटे एरियर्स तयार करून ती रक्कम स्वतःच्या बँक खात्यांमध्ये वर्ग करण्यात आली. या संगनमतातून शासनाची तब्बल ₹१,५५,००,००० इतक्या रकमेची फसवणूक झाल्याचे उघड झाले आहे.या प्रकरणी धुळे शहर पोलीस ठाण्यात भारतीय न्याय संहिता (BNS) अंतर्गत फसवणूक, विश्वासघात, शासकीय निधीचा अपहार, बनावट कागदपत्रे तयार करणे, बनावट इलेक्ट्रॉनिक नोंदी तयार करणे तसेच संगनमत अशा गंभीर स्वरूपाच्या विविध कलमांन्वये गुन्हा दाखल करण्यात आला आहे. काल रात्री उशिरा चारही संशयित आरोपींना अटक करण्यात आली असून त्यांची सखोल चौकशी सुरू आहे.या घोटाळ्याचे स्वरूप, आर्थिक व्यवहारांची गुंतागुंत आणि डिजिटल पुराव्यांची व्याप्ती लक्षात घेऊन या गुन्ह्याचा पुढील तपास धुळे आर्थिक गुन्हे शाखेकडे (Economic Offences Wing) वर्ग करण्यात आला आहे. तपासादरम्यान आणखी काही अधिकारी किंवा कर्मचारी सहभागी होते का, इतर खात्यांमध्येही निधी वळविण्यात आला आहे का, तसेच या प्रकारामागे मोठे रॅकेट कार्यरत होते का, याचाही तपास केला जाणार आहे.जिल्हा पोलीस अधीक्षक विशाल आनंद यांनी या प्रकरणाला दुजोरा देत, घोटाळ्याची व्याप्ती लक्षात घेता निष्पक्ष, सखोल आणि पुराव्याधारित तपासाचे आदेश दिले असल्याची माहिती दिली आहे.कायद्याचे रक्षण करणाऱ्या पोलिसांना प्रशिक्षण देणाऱ्या संस्थेतच असा कोट्यवधींचा आर्थिक घोटाळा उघड झाल्याने नागरिकांमध्ये संताप व्यक्त होत असून, या प्रकरणातील प्रत्येक दोषीवर कठोर कायदेशीर कारवाई व्हावी, तसेच शासकीय यंत्रणांमधील आर्थिक व्यवहारांची पारदर्शकता आणि सुरक्षा अधिक मजबूत करण्याची मागणी जोर धरू लागली आहे.