🚨 घोडेगाव गोळीबार खून प्रकरणात मोठी कारवाई! फरार आरोपी पुणे जिल्ह्यातून स्थानिक गुन्हे शाखेच्या जाळ्यात; फुलमाळी टोळीला आणखी एक मोठा दणका

सत्यध्येय एकविचार 

अहिल्यानगर | प्रतिनिधी

घोडेगाव येथे जनावरांच्या कर पावतीच्या लिलावाच्या वादातून झालेल्या थरारक गोळीबारातील खून प्रकरणात स्थानिक गुन्हे शाखा, अहिल्यानगरने मोठे यश मिळवत फुलमाळी टोळीतील फरार आरोपीला पुणे जिल्ह्यातून ताब्यात घेतले आहे. सात दिवसांच्या अथक शोधमोहीम, तांत्रिक विश्लेषण आणि गुप्त माहितीच्या आधारे ही कारवाई करण्यात आली असून, या अटकेमुळे खून प्रकरणाच्या तपासाला महत्त्वाची दिशा मिळाली आहे.पोलिसांनी दिलेल्या माहितीनुसार, घोडेगाव येथील जनावरांच्या कर पावतीच्या लिलावावरून गेल्या दीड वर्षांपासून दोन गटांमध्ये वाद सुरू होता. याच जुन्या वैमनस्यातून १२ फेब्रुवारी २०२६ रोजी नितीन विलास शिरसाठ यांच्यावर गावठी कट्ट्यातून गोळीबार करण्यात आला. या हल्ल्यात त्यांचा मृत्यू झाला. या प्रकरणी सोनई पोलीस ठाण्यात गुन्हा क्र. ५०/२०२६ अन्वये भारतीय न्याय संहिता, २०२३ मधील कलम १०३(१), १८९(२), १९१(२), १९१(३) तसेच आर्म्स अँक्ट ३/२५ अंतर्गत खुनाचा गंभीर गुन्हा दाखल करण्यात आला आहे.या गुन्ह्यात यापूर्वी गुलाब सादिक फुलमाळी, सूरज फुलमाळी आणि आकाश आण्णा फुलमाळी या आरोपींना अटक करण्यात आली होती. मात्र, गणेश कारभारी साबळे (वय ३७, रा. पानसवाडी, ता. नेवासा) हा गुन्ह्यानंतर फरार होता.पोलीस अधीक्षक मुम्मका सुदर्शन यांनी या खून प्रकरणाचे गांभीर्य लक्षात घेऊन फरार आरोपीला तातडीने अटक करण्याचे आदेश स्थानिक गुन्हे शाखेला दिले होते. त्यानुसार पोलीस निरीक्षक संतोष मुटकुळे यांच्या नेतृत्वाखाली पोउपनि. संदीप दरवडे तसेच गणेश धोत्रे, फुरकान शेख, शाहिद शेख, बाळासाहेब नागरगोजे, योगेश कडीले, प्रशांत राठोड आणि चालक अरुण मोरे यांचे विशेष पथक तयार करण्यात आले.हे पथक सलग सात दिवस आरोपीच्या मागावर होते. तांत्रिक माहिती, गुप्त बातमीदारांचे जाळे आणि व्यावसायिक तपास कौशल्याच्या आधारे आरोपीच्या हालचालींवर बारकाईने लक्ष ठेवण्यात आले. अखेर ३ जुलै २०२६ रोजी आरोपी पुणे जिल्ह्यातील वाकड परिसरात असल्याची खात्रीशीर माहिती मिळताच पथकाने तात्काळ सापळा रचून त्याला ताब्यात घेतले.चौकशीदरम्यान आरोपीने आपल्या साथीदारांसह गुन्ह्यात सहभाग असल्याची कबुली दिल्याची माहिती पोलिसांनी दिली आहे. ताब्यातील आरोपी हा कृष्णा फुलमाळी टोळीशी संबंधित असून या टोळीविरुद्ध यापूर्वीही अनेक गंभीर गुन्हे दाखल असल्याचे पोलिसांनी सांगितले. आरोपीला पुढील कायदेशीर कारवाईसाठी सोनई पोलीस ठाण्याच्या ताब्यात देण्यात आले असून, या प्रकरणाचा पुढील तपास उपविभागीय पोलीस अधिकारी, शेवगाव विभाग करीत आहेत.ही धडक कारवाई पोलीस अधीक्षक मुम्मका सुदर्शन, अपर पोलीस अधीक्षक वैभव कलुवमें आणि उपविभागीय पोलीस अधिकारी नीरज राजगुरू यांच्या मार्गदर्शनाखाली स्थानिक गुन्हे शाखेचे पोलीस निरीक्षक संतोष मुटकुळे व त्यांच्या पथकाने यशस्वीरीत्या पार पाडली. या कारवाईमुळे घोडेगाव खून प्रकरणातील तपासाला मोठी गती मिळाली असून संघटित गुन्हेगारीविरोधातील पोलिसांची कारवाई अधिक तीव्र झाल्याचे स्पष्ट झाले आहे.