🚨 धुळे एलसीबीचा मोठा दणका! गुंगीकारक कफ सिरपचा काळाबाजार उधळला; १६० बाटल्यांसह आरोपी जेरबंद

सत्यध्येय एकविचार 

धुळे | प्रतिनिधी : मानवी मेंदूवर विपरीत परिणाम करणाऱ्या गुंगीकारक कफ सिरपच्या अवैध साठा व विक्रीविरोधात धुळे स्थानिक गुन्हे शाखेने धडक कारवाई करत ₹18,400 किमतीच्या 160 गुंगीकारक कफ सिरपच्या बाटल्या जप्त करून किरण वसंत सकट (रा. मच्छीबाजार, शिरपूर) याला अटक केली आहे.धुळे जिल्ह्याचे पोलीस अधीक्षक श्री. विशाल आनंद यांच्या आदेशानुसार जिल्ह्यात गुंगीकारक औषधांच्या अवैध व्यापाराविरोधात विशेष मोहीम राबविण्यात येत आहे. अपर पोलीस अधीक्षक श्री. अजय देवरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक ज्ञानेश्वर वारे यांनी मिळालेल्या गोपनीय माहितीची खातरजमा करून तात्काळ विशेष पथक रवाना केले.दि. ३ जुलै २०२६ रोजी मिळालेल्या खात्रीशीर माहितीनुसार आरोपी सुरत येथून शिंदखेडा मार्गे शिरपूर येथे गुंगीकारक कफ सिरप विक्रीसाठी आणत असल्याची माहिती मिळाली होती. त्यानुसार राजपत्रित अधिकारी व दोन शासकीय पंच यांच्या उपस्थितीत शिंदखेडा रेल्वे स्टेशन रोडवरील कुमरेज फाट्याजवळ सापळा रचण्यात आला.तपासणीदरम्यान आरोपीच्या ताब्यातील दोन बॅगमधून Codeine Phosphate आणि Triprolidine Hydrochloride घटक असलेल्या ‘Conez TR’ या १०० मिलीच्या १६० सिलबंद कफ सिरपच्या बाटल्या जप्त करण्यात आल्या. जप्त मुद्देमालाची एकूण किंमत ₹१८,४०० आहे.याप्रकरणी शिंदखेडा पोलीस ठाणे गु.र.नं. १६४/२०२६ अन्वये भारतीय न्याय संहिता (BNS) कलम १२३, २७८, गुंगीकारक औषधी द्रव्य आणि मनोव्यापारावर परिणाम करणारे पदार्थ अधिनियम (NDPS Act) १९८५ चे कलम ८(क), २१(ब), २२ तसेच औषधी द्रव्य व सौंदर्य प्रसाधन अधिनियम १९४० चे कलम १८(क) अंतर्गत गुन्हा दाखल करण्यात आला आहे.या गुन्ह्याचा पुढील तपास सहायक पोलीस निरीक्षक दिपक ढोके करीत असून, आरोपीने हा साठा नेमका कुठून आणला, त्यामागील मुख्य पुरवठादार व संपूर्ण रॅकेटचा शोध घेण्यासाठी सखोल तपास सुरू आहे.ही उल्लेखनीय कारवाई पोलीस अधीक्षक श्री. विशाल आनंद, अपर पोलीस अधीक्षक श्री. अजय देवरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक ज्ञानेश्वर वारे, सहायक पोलीस निरीक्षक दिपक ढोके तसेच पोलीस अंमलदार प्रशांत चौधरी, चेतन बोरसे, संतोष हिरे, कमलेश सूर्यवंशी, विनायक खैरनार, हर्षल चौधरी, राहुल गिरी, प्रशांत माळे आणि संजय सुरसे यांनी यशस्वीपणे पार पाडली.