🚨 अवघ्या 24 तासांत जबरीचोरीचा पर्दाफाश! मारहाण, लूट आणि ऑनलाइन फसवणुकीप्रकरणी चौघांच्या टोळीचा छडा; ₹54,900 चा मुद्देमाल जप्त

सत्यध्येय एकविचार

धुळे | प्रतिनिधी

धुळे शहरातील शंभर फुटी रोड परिसरात डी-मार्टजवळ घडलेल्या जबरीचोरी, मारहाण आणि ऑनलाइन आर्थिक फसवणुकीच्या गंभीर गुन्ह्याचा अवघ्या 24 तासांत छडा लावत चाळीसगाव रोड पोलिसांनी उल्लेखनीय कामगिरी बजावली आहे. या कारवाईत एका विधीसंघर्षग्रस्त बालकासह चौघांच्या टोळीचा सहभाग उघडकीस आला असून ₹54,900 किमतीचा मुद्देमाल हस्तगत करण्यात आला आहे.पोलिसांनी दिलेल्या माहितीनुसार, 30 जून 2026 रोजी मध्यरात्री फिर्यादी शोएब शब्बीर शहा (रा. म्हसदी) यांना अडवून आरोपींनी त्यांच्यावर मारहाण केली. त्यानंतर त्यांचा मोबाईल फोन, ₹4,000 रोख रक्कम जबरदस्तीने हिसकावून घेतली. एवढ्यावरच न थांबता, मोबाईलमधील OTP चा गैरवापर करून आरोपींनी ₹900 ऑनलाइन ट्रान्सफर करून आर्थिक फसवणूकही केली आणि घटनास्थळावरून फरार झाले.घटनेचे गांभीर्य लक्षात घेऊन चाळीसगाव रोड पोलीस ठाण्याचे प्रभारी अधिकारी सपोनि. विवेक पवार यांच्या नेतृत्वाखाली विशेष तपास पथकाने तातडीने तपास सुरू केला. तांत्रिक विश्लेषण, गोपनीय माहिती आणि विविध पुराव्यांच्या आधारे पोलिसांनी एका विधीसंघर्षग्रस्त बालकाला ताब्यात घेतले. चौकशीदरम्यान त्याने आपल्या तीन साथीदारांसह हा गुन्हा केल्याची कबुली दिली.त्यानंतर पोलिसांनी आरोपींकडून चोरीस गेलेला विवो मोबाईल, रोख रक्कम, ऑनलाइन ट्रान्सफरची रक्कम तसेच गुन्ह्यात वापरण्यात आलेली हिरो स्लेंडर मोटारसायकल असा एकूण ₹54,900 किमतीचा मुद्देमाल जप्त केला.या प्रकरणात आरोपी हर्षल राजेंद्र मेढे याला अटक करण्यात आली असून उर्वरित दोन फरार आरोपींचा शोध युद्धपातळीवर सुरू आहे. संबंधित आरोपींविरुद्ध भारतीय न्याय संहितेतील लागू असलेल्या तरतुदींनुसार पुढील कायदेशीर कारवाई सुरू आहे.ही यशस्वी कारवाई पोलीस अधीक्षक विशाल आनंद, अपर पोलीस अधीक्षक अजय देवरे आणि उपविभागीय पोलीस अधिकारी राजकुमार उपासे यांच्या मार्गदर्शनाखाली चाळीसगाव रोड पोलीस ठाण्याचे प्रभारी अधिकारी विवेक पवार, पोउनि. संदीप काळे तसेच त्यांच्या पथकाने अत्यंत तत्परतेने पार पाडली.अवघ्या 24 तासांत गुन्ह्याचा छडा लावून आरोपींना जेरबंद करण्यात आल्याने चाळीसगाव रोड पोलिसांच्या तत्पर तपासाचे नागरिकांकडून कौतुक होत आहे.