🚨 पाचोऱ्यात गुटखा माफियांना मोठा दणका! ८.९८ लाखांचा प्रतिबंधित गुटखा व चारचाकीसह जप्त; आरोपीविरुद्ध गुन्हा दाखल

सत्यध्येय एकविचार 

पाचोरा (प्रतिनिधी):

महाराष्ट्रात विक्री व साठवणुकीस प्रतिबंध असलेल्या गुटखा-पान मसाल्याच्या अवैध व्यवसायाविरोधात अन्न सुरक्षा विभाग व पाचोरा पोलीस प्रशासनाने संयुक्तपणे धडक कारवाई करत गुटखा माफियांना मोठा दणका दिला आहे. गुप्त माहितीच्या आधारे टाकलेल्या छाप्यात सुमारे ८ लाख ९८ हजार रुपयांचा मुद्देमाल जप्त करण्यात आला असून संबंधित आरोपीविरुद्ध पाचोरा पोलीस ठाण्यात गुन्हा दाखल करण्यात आला आहे.विश्वसनीय गोपनीय माहितीच्या आधारे जळगाव येथील अन्न सुरक्षा अधिकारी किशोर बाविस्कर यांनी तातडीने कारवाईची सूत्रे हाती घेतली. त्यांनी ही माहिती पोलीस निरीक्षक राहुलकुमार पवार यांना देत संयुक्त पथकासह पाचोरा शहरातील पुनगाव रोडवरील आशीर्वाद रेसिडेन्सी येथे छापा टाकला.छाप्यादरम्यान एमएच-१४ जेएम-०३३२ क्रमांकाच्या चारचाकी वाहनाची तपासणी करण्यात आली. वाहनाच्या डिकीत महाराष्ट्रात प्रतिबंधित असलेल्या गुटखा-पान मसाल्याच्या मोठ्या प्रमाणातील गोण्या आढळून आल्या. पथकाने ४ लाख रुपये किमतीची चारचाकी तसेच ४ लाख ९८ हजार रुपये किमतीचा प्रतिबंधित गुटखा-पान मसाला असा एकूण ८ लाख ९८ हजार रुपयांचा मुद्देमाल जप्त केला.या कारवाईत पोलीस कॉन्स्टेबल गजानन जोशी व बजुसिंग बंजारा यांनीही सक्रिय सहभाग घेतला. जप्त मुद्देमाल पाचोरा पोलीस ठाण्यात आणून प्रशांत चौधरी याच्याविरुद्ध संबंधित कायद्यांनुसार गुन्हा नोंदविण्यात आला आहे.या प्रकरणाचा पुढील तपास पोलीस उपनिरीक्षक कृष्णा घायाळ हे पोलीस निरीक्षक राहुलकुमार पवार यांच्या मार्गदर्शनाखाली करत आहेत.अन्न सुरक्षा विभाग व पोलीस प्रशासनाच्या या संयुक्त धडक कारवाईमुळे पाचोरा शहरासह परिसरात प्रतिबंधित गुटखा-पान मसाल्याची अवैध विक्री, साठवणूक आणि तस्करी करणाऱ्यांमध्ये मोठी खळबळ उडाली असून, अशा बेकायदेशीर व्यवसायाविरोधातील कारवाई आणखी तीव्र होण्याचे संकेत मिळत आहेत.