सत्यध्येय एकविचार | नंदुरबार प्रतिनिधी
नंदुरबार : नंदुरबार जिल्ह्यात मद्य तस्करीविरोधात म्हसावद पोलिसांनी आतापर्यंतच्या मोठ्या कारवायांपैकी एक धडक कारवाई करत कथित आंतरराज्य मद्य तस्करीच्या साखळीवर जबर प्रहार केला आहे. शहादा तालुक्यातील जावदे तर्फे बोरद गावाजवळ बंद अवस्थेत असलेल्या एका खासगी जिनिंग अँड प्रेसिंग कंपनीच्या परिसरावर पोलिसांनी छापा टाकून तब्बल ४ कोटी २ लाख ७४ हजार रुपये किमतीचा विदेशी मद्यसाठा व वाहनांसह मोठा मुद्देमाल जप्त केल्याची माहिती आहे. या कारवाईत फॉर्च्युनर, इनोव्हा, स्कॉर्पिओसह विविध महागडी आणि मालवाहू वाहने मिळून एकूण १६ वाहने पोलिसांनी ताब्यात घेतली असून, तीन संशयितांना चौकशीसाठी ताब्यात घेण्यात आले आहे. या अभूतपूर्व कारवाईमुळे नंदुरबार जिल्ह्यासह महाराष्ट्र–गुजरात सीमावर्ती भागातील कथित मद्य तस्करांच्या गोटात प्रचंड खळबळ उडाली आहे.जावदे तर्फे बोरद गावाजवळील ‘हरी ओम फायबर प्रायव्हेट लिमिटेड जिनिंग अँड प्रेसिंग’ या बंद अवस्थेतील कंपनीच्या परिसरात मोठ्या प्रमाणावर विदेशी मद्याचा अवैध साठा करण्यात आल्याची गोपनीय माहिती म्हसावद पोलीस ठाण्याचे सहाय्यक पोलीस निरीक्षक रमेश वावरे यांना मिळाली होती. माहितीचे गांभीर्य लक्षात घेत जिल्हा पोलीस अधीक्षक अश्विनी सानप यांच्या मार्गदर्शनाखाली सहाय्यक पोलीस निरीक्षक रमेश वावरे यांनी विशेष पथकासह संबंधित जिनिंगवर धाड टाकली. पोलिसांनी बंद जिनिंगचा परिसर पिंजून काढत सखोल तपासणी केली असता, तेथे उभ्या असलेल्या अनेक वाहनांमध्ये विदेशी मद्याचे मोठ्या प्रमाणावर खोके भरलेले आढळून आले. कारवाईचा आवाका एवढा मोठा होता की दुपारपासून सुरू झालेली जप्त मुद्देमालाची तपासणी, मोजदाद आणि नोंदणीची प्रक्रिया रात्री उशिरापर्यंत सुरू होती.या धडक कारवाईत पोलिसांनी केवळ कोट्यवधी रुपयांचा मद्यसाठाच नव्हे, तर कथित तस्करीसाठी वापर झाल्याचा संशय असलेला वाहनांचा मोठा ताफाही ताब्यात घेतला आहे. जप्त वाहनांमध्ये टोयोटा फॉर्च्युनर, इनोव्हा, स्कॉर्पिओ, होंडा, इको तसेच विविध पिकअप वाहनांसह १४ चारचाकी वाहनांचा समावेश आहे. याशिवाय आयसर कंपनीचा एक मोठा ट्रक आणि टाटा कंपनीचा एक कंटेनर, अशी एकूण १६ वाहने पोलिसांच्या ताब्यात आली आहेत. महागड्या कारपासून मोठ्या कंटेनरपर्यंत एवढ्या मोठ्या संख्येने वाहने आणि कोट्यवधी रुपयांचा मद्यसाठा एकाच ठिकाणी आढळल्याने ही केवळ किरकोळ अवैध मद्य वाहतुकीची घटना नसून, यामागे अत्यंत नियोजनबद्ध आणि संघटित आंतरराज्य साखळी कार्यरत आहे का, या दिशेने पोलिसांचा तपास सुरू असल्याचे समजते.जप्त करण्यात आलेल्या मद्यसाठ्यात विविध नामांकित कंपन्यांच्या विदेशी मद्याच्या बाटल्या तसेच मोठ्या प्रमाणावर बिअरच्या बॉक्सचा समावेश असल्याची माहिती आहे. हा मद्यसाठा नेमका कुठून आणण्यात आला, त्याचा मूळ मालक कोण, बंद जिनिंगच्या परिसरात एवढ्या मोठ्या प्रमाणावर साठा किती दिवसांपासून केला जात होता, संबंधित जागेचा वापर करण्यामागे कोणाचा सहभाग आहे आणि हा मद्यसाठा गुजरातमध्ये नेमका कोणाकडे पोहोचविण्यात येणार होता, अशा अनेक गंभीर प्रश्नांचा आता पोलीस तपासातून उलगडा होणे अपेक्षित आहे. जप्त वाहनांची मालकी, त्यांचा पूर्वीचा वापर, संभाव्य वाहतूक मार्ग तसेच या व्यवहाराशी संबंधित आर्थिक देवाणघेवाणीचाही तपास होण्याची शक्यता आहे.प्राथमिक माहितीनुसार, संबंधित विदेशी मद्याचा साठा गुजरात राज्यात तस्करीद्वारे पाठविण्याच्या तयारीत असल्याचा संशय व्यक्त केला जात आहे. त्यामुळे या प्रकरणातील संभाव्य ‘गुजरात कनेक्शन’ आता तपासाच्या केंद्रस्थानी आले आहे. महाराष्ट्रातून गुजरातकडे मद्य वाहतुकीसाठी कोणते मार्ग वापरले जात होते, या साखळीत आणखी किती व्यक्ती सहभागी आहेत, मद्याचा पुरवठादार कोण आणि गुजरातमधील अंतिम प्राप्तकर्ता कोण होता, याचा सखोल शोध पोलिसांकडून घेतला जात आहे. या प्रकरणी ताब्यात घेण्यात आलेल्या तीन संशयितांची कसून चौकशी सुरू असून, त्यांच्या चौकशीतून कथित आंतरराज्य मद्य तस्करी रॅकेटचे आणखी मोठे धागेदोरे आणि संबंधित व्यक्तींची नावे समोर येण्याची शक्यता व्यक्त केली जात आहे.नंदुरबार जिल्ह्यातील आजवरच्या मोठ्या मद्यविरोधी कारवायांपैकी एक मानली जाणारी ही कारवाई जिल्हा पोलीस अधीक्षक अश्विनी सानप, अप्पर पोलीस अधीक्षक आशित कांबळे, पोलीस उपअधीक्षक गुलाबराव पाटील आणि गुन्हे अन्वेषण शाखेचे पोलीस निरीक्षक हेमंत पाटील यांच्या मार्गदर्शनाखाली पार पडली. कारवाईचे नेतृत्व सहाय्यक पोलीस निरीक्षक रमेश वावरे यांनी केले. या मोहिमेत पोलीस हवालदार मुकेश राठोड, दादाभाई साबळे, विकास कापुरे, अजय पवार, युवराज रावताळे, उमेश पावरा, राकेश पावरा, धीरसिंग वळवी, दीपक पाटील, प्रवीण पवार तसेच इतर पोलीस कर्मचाऱ्यांच्या पथकाने मोलाची आणि धाडसी कामगिरी बजावली. या प्रकरणाचा पुढील तपास सहाय्यक पोलीस निरीक्षक रमेश वावरे करीत आहेत.तब्बल चार कोटींहून अधिक किमतीचा मद्यसाठा आणि १६ वाहनांचा ताफा एकाच ठिकाणी पोलिसांच्या हाती लागल्याने या कथित तस्करी साखळीची व्याप्ती किती मोठी आहे, याबाबत आता गंभीर चर्चा सुरू झाली आहे. कोट्यवधी रुपयांचा मद्यसाठा एका दिवसात उभा राहत नाही आणि एवढा मोठा वाहनांचा ताफाही कोणत्याही नियोजनाशिवाय एकत्र येत नाही. त्यामुळे पोलिसांचा तपास जप्त मुद्देमाल आणि ताब्यातील संशयितांपुरता मर्यादित न राहता या प्रकरणामागील मुख्य सूत्रधार, आर्थिक लाभार्थी आणि आंतरराज्य संपर्कापर्यंत पोहोचणार का, याकडे संपूर्ण नंदुरबार जिल्ह्याचे लक्ष लागले आहे. दरम्यान, ताब्यात घेतलेल्या व्यक्तींबाबत दोषनिश्चिती न्यायालयीन प्रक्रियेनंतरच होणार असून, प्रकरणातील नेमकी कायदेशीर कलमे, अटक आणि पुढील तपासाबाबतची अधिकृत माहिती पोलीस तपासानुसार स्पष्ट होणार आहे.
