🚨 १५ दिवसांची थरारक मोहीम यशस्वी! पोलीसांवर गोळीबार करणारा व ₹१०.५६ लाखांच्या सोनार लुटीतील कुख्यात आरोपी पावलस गायकवाड एलसीबीच्या जाळ्यात; २ गावठी पिस्टल, ४ जिवंत काडतुसे जप्त

सत्यध्येय एकविचार 

अहिल्यानगर | प्रतिनिधी

सोलापूर जिल्ह्यातील अक्कलकोट दक्षिण पोलीस ठाण्याच्या हद्दीत भरदिवसा सोनाराचे अपहरण करून ₹१० लाख ५६ हजारांचे सोने-चांदीचे दागिने लुटणारा तसेच पाथर्डी येथे त्याला पकडण्यासाठी गेलेल्या पोलीस पथकावर गोळीबार करून फरार झालेला कुख्यात सराईत आरोपी पावलस कचरू गायकवाड (वय ३८, रा. खरवंडी कासार, ता. पाथर्डी, जि. अहिल्यानगर) याला स्थानिक गुन्हे शाखा (एलसीबी), अहिल्यानगरच्या पथकाने अत्यंत धाडसी आणि नियोजनबद्ध कारवाईत जेरबंद केले आहे. आरोपीकडून दोन गावठी बनावटीची पिस्टले, चार जिवंत काडतुसे आणि दोन मोबाईल फोन असा एकूण ₹१ लाख ३४ हजारांचा मुद्देमाल जप्त करण्यात आला आहे.दिनांक २९ मे २०२६ रोजी जेऊर-करजगी रस्त्यावरील लकी ढाब्यासमोर फिर्यादी सोनाराची मोटारसायकल अडवून आरोपींनी त्यांचे अपहरण केले. चाकूचा धाक दाखवत मारहाण करून त्यांच्या ताब्यातील ₹१०.५६ लाखांचे सोने-चांदीचे दागिने असलेली बॅग लुटली आणि त्यांना निर्जन ठिकाणी सोडून आरोपी पसार झाले. या प्रकरणी अक्कलकोट दक्षिण पोलीस ठाणे, सोलापूर ग्रामीण येथे गुन्हा क्र. ३२४/२०२६ दाखल करण्यात आला होता.तपासादरम्यान आरोपी पावलस गायकवाड हा पाथर्डी परिसरात असल्याची माहिती मिळाल्यानंतर सोलापूर ग्रामीण स्थानिक गुन्हे शाखा व पाथर्डी पोलिसांनी संयुक्त कारवाई केली. मात्र आरोपीने स्वतःजवळील गावठी कट्ट्यातून पोलीसांवर थेट गोळीबार करून जीव घेण्याचा प्रयत्न केला आणि घटनास्थळावरून फरार झाला. या प्रकरणी पाथर्डी पोलीस ठाण्यात गुन्हा क्र. ६९८/२०२६ दाखल करण्यात आला.या गंभीर घटनेची दखल घेत पोलीस अधीक्षक श्री. मुम्मका सुदर्शन यांनी आरोपीला तात्काळ अटक करण्याचे आदेश दिले. त्यानुसार पोलीस निरीक्षक श्री. संतोष मुटकुळे यांच्या नेतृत्वाखाली विशेष पथक तयार करण्यात आले. आरोपी हा अत्यंत धोकादायक असून नेहमी शस्त्र बाळगत असल्याने पोलिसांनी अत्यंत गोपनीय आणि नियोजनबद्ध पद्धतीने सलग १५ दिवस आरोपीचा माग काढला.दिनांक २ जुलै २०२६ रोजी गुप्त बातमीदारामार्फत आरोपी तिसगाव शिवारातील मढी देवस्थानाकडे जाणाऱ्या रस्त्यावरील कमानीजवळ असल्याची माहिती मिळाली. स्थानिक गुन्हे शाखेचे पथक तात्काळ घटनास्थळी पोहोचले. पोलिसांची चाहूल लागताच आरोपीने पळून जाण्याचा प्रयत्न केला. मात्र पोलिसांनी त्याचा पाठलाग करून शिताफीने जेरबंद केले. चौकशीदरम्यान त्याने स्वतःचे नाव पावलस कचरू गायकवाड असल्याचे सांगितले.झडतीदरम्यान आरोपीकडून ₹१ लाख किमतीची दोन गावठी बनावटीची पिस्टले, ₹४ हजार किमतीची चार जिवंत काडतुसे आणि ₹३० हजार किमतीचे दोन मोबाईल फोन असा एकूण ₹१ लाख ३४ हजारांचा मुद्देमाल जप्त करण्यात आला. या प्रकरणी पोलीस कॉन्स्टेबल सतिष पोपट भवर यांच्या फिर्यादीवरून पाथर्डी पोलीस ठाण्यात गुन्हा क्र. ७९७/२०२६ भारतीय हत्यार कायद्यान्वये दाखल करण्यात आला असून आरोपीला पाथर्डी गोळीबार प्रकरण तसेच सोलापूरातील जबरी चोरीच्या गुन्ह्यात वर्ग करून पुढील तपास सुरू आहे.तपासात आरोपी पावलस गायकवाड हा रेकॉर्डवरील सराईत गुन्हेगार असल्याचे समोर आले आहे. त्याच्याविरुद्ध अहिल्यानगर, जालना, नवी मुंबई आणि सोलापूर जिल्ह्यांत खुनाचा प्रयत्न, दरोडा, अपहरण, जबरी चोरी, बलात्कार, पोक्सो तसेच शस्त्र कायद्यांतर्गत गंभीर स्वरूपाचे अनेक गुन्हे दाखल आहेत.ही धाडसी कारवाई पोलीस अधीक्षक श्री. मुम्मका सुदर्शन, अपर पोलीस अधीक्षक श्री. वैभव कलुबर्मे आणि उपविभागीय पोलीस अधिकारी श्री. निरज राजगुरु (शेवगाव विभाग) यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. संतोष मुटकुळे यांच्या नेतृत्वाखाली पोलीस उपनिरीक्षक संदीप दरवडे, पोलीस उपनिरीक्षक कृष्णकुमार सेदवाड, पोलीस हेड कॉन्स्टेबल गणेश शिवाजी धोत्रे, पोलीस हेड कॉन्स्टेबल फुरकान शेख, पोलीस हेड कॉन्स्टेबल बाळासाहेब ज्ञानदेव नागरगोजे, पोलीस कॉन्स्टेबल विशाल आण्णासाहेब तनपुरे, पोलीस कॉन्स्टेबल बाळासाहेब अशोक गुंजाळ, पोलीस कॉन्स्टेबल अमोल श्रीरंग आजबे, पोलीस कॉन्स्टेबल सतिष पोपट भवर, पोलीस कॉन्स्टेबल प्रकाश नवनाथ मांडगे, पोलीस कॉन्स्टेबल प्रशांत राठोड, चालक पोलीस हेड कॉन्स्टेबल उत्तरेश्वर सोमनाथ मोराळे आणि चालक पोलीस कॉन्स्टेबल अरुण भिमराज मोरे यांनी यशस्वीरीत्या पार पाडली.या कारवाईमुळे पोलीसांवर गोळीबार करणारा आणि सोलापूरातील गाजलेल्या सोनार लुटीतील मुख्य आरोपी गजाआड झाला असून, त्याच्याकडून आणखी अनेक गंभीर गुन्ह्यांचा उलगडा होण्याची शक्यता पोलिसांनी व्यक्त केली आहे.