जळगाव/प्रतिनिधी
जळगाव शहरात विनापरवाना आणि बेकायदेशीररीत्या वास्तव्यास असलेल्या परदेशी नागरिकांविरोधात सुरू असलेल्या विशेष शोध मोहिमेला शनिपेठ पोलिसांनी मोठे यश मिळवले आहे. गुप्त माहितीच्या आधारे करण्यात आलेल्या कारवाईत एका बांगलादेशी महिलेला ताब्यात घेण्यात आले असून, तिला आश्रय देणाऱ्या स्थानिक व्यक्तीवरही गंभीर कलमान्वये गुन्हा दाखल करण्यात आला आहे. या कारवाईमुळे शहरात मोठी खळबळ उडाली असून, अवैध वास्तव्य करणाऱ्यांमध्ये भीतीचे वातावरण निर्माण झाले आहे.जळगाव जिल्हा पोलीस अधीक्षक श्रीकांत धिवरे यांच्या आदेशानुसार शहरात परदेशी नागरिकांची पडताळणी, अवैध वास्तव्य आणि बनावट कागदपत्रांविरोधात विशेष मोहीम राबविण्यात येत आहे. त्याच मोहिमेअंतर्गत शनिपेठ पोलीस स्टेशनच्या हद्दीत ही महत्त्वपूर्ण कारवाई करण्यात आली.पोलिसांना गुप्त बातमीदारामार्फत माहिती मिळाली होती की, जळगाव शहरातील भोई गल्ली, जोशी पेठ परिसरात एक परदेशी महिला कोणतीही वैध कागदपत्रे नसताना वास्तव्यास आहे. या माहितीची गंभीर दखल घेत शनिपेठ पोलिसांनी दि. १० मे २०२६ रोजी संबंधित ठिकाणी छापा टाकला.या छाप्यात कोणिका राणी शामलचंद्र राय (वय २०, मूळ रा. बांगलादेश) ही महिला पोलिसांच्या ताब्यात आली. चौकशीदरम्यान तिच्याकडे भारतात वास्तव्य करण्यासाठी आवश्यक असलेले कोणतेही वैध दस्तऐवज — जसे पासपोर्ट किंवा व्हिसा — नसल्याचे उघड झाले. प्राथमिक तपासात संबंधित महिलेने अनधिकृत मार्गाने भारत-बांगलादेश सीमा ओलांडून भारतात प्रवेश केल्याचे समोर आले. त्यानंतर ती जळगावमध्ये बेकायदेशीररित्या वास्तव्यास असल्याचे पोलिस तपासात निष्पन्न झाले.या प्रकरणात पोलिसांनी चिन्मय जगन्नाथ वाला (रा. भोई गल्ली, जोशी पेठ, जळगाव; मूळ रा. पश्चिम बंगाल) याच्याविरुद्धही गुन्हा दाखल केला आहे. संबंधित महिला बांगलादेशी नागरिक असल्याची पूर्ण माहिती असूनही त्याने तिला आश्रय दिला, तसेच पोलिसांपासून ही माहिती लपवून ठेवली असल्याचा आरोप पोलिसांनी केला आहे.शनिपेठ पोलीस स्टेशनमध्ये CCTNS क्रमांक १०२/२०२६ अंतर्गत इमिग्रेशन आणि परदेशी नागरिक कायदा २०२५ मधील कलम २१, ०८ आणि २४ अन्वये गुन्हा दाखल करण्यात आला आहे. दोन्ही आरोपींना पोलिसांनी ताब्यात घेतले असून पुढील चौकशी सुरू आहे.या प्रकरणाचा पुढील तपास सहाय्यक पोलीस निरीक्षक साजिद मन्सुरी यांच्या मार्गदर्शनाखाली सुरू असून शनिपेठ पोलीस स्टेशनचे विशेष पथक अधिक तपास करत आहे.दरम्यान, पोलिसांच्या या कारवाईमुळे जळगाव शहरातील अवैध वास्तव्य करणाऱ्या परदेशी नागरिकांमध्ये मोठी दहशत निर्माण झाली आहे. आगामी काळात अशी मोहीम आणखी तीव्र करण्यात येणार असल्याचे संकेत प्रशासनाने दिले आहेत.जिल्ह्यात कोणतीही संशयास्पद व्यक्ती, अवैध वास्तव्य, बनावट कागदपत्रे किंवा परदेशी नागरिकांबाबत माहिती आढळल्यास ती तात्काळ जवळच्या पोलीस स्टेशनमध्ये किंवा पोलिस हेल्पलाईनवर कळवावी, असे आवाहन पोलीस अधीक्षक श्रीकांत धिवरे यांनी केले आहे.
