शिरपूर | प्रतिनिधी
शिरपूर तालुक्यातील बभळाज परिसरात महावितरणच्या कथित निष्काळजी कारभाराविरोधात शनिवारी मध्यरात्री शेतकऱ्यांचा संताप उसळला. शेतीपंपांना नियोजित वेळेनुसार वीजपुरवठा न झाल्याने संतप्त शेतकऱ्यांनी शिरपूर–चोपडा महामार्गावर रास्ता रोको आंदोलन करत प्रशासनाविरोधात तीव्र नाराजी व्यक्त केली. या आंदोलनामुळे महामार्गावरील वाहतूक काही काळ पूर्णपणे ठप्प झाली असून दोन्ही बाजूंना वाहनांच्या लांबच लांब रांगा लागल्या होत्या.महावितरणच्या वेळापत्रकानुसार बभळाज परिसरातील शेतकऱ्यांना रात्री ९ ते पहाटे ४ या कालावधीत शेतीसाठी वीजपुरवठा मिळणे अपेक्षित होते. त्यानुसार अनेक शेतकरी शेतात पाणी देण्यासाठी रात्रीच पोहोचले होते. मात्र नियोजित वेळ उलटूनही वीजपुरवठा सुरू न झाल्याने सुरुवातीला तांत्रिक बिघाड असावा असे मानून शेतकरी प्रतीक्षा करत राहिले. परंतु रात्री उशिरापर्यंत वीज न आल्याने शेतकऱ्यांचा संयम सुटला.दरम्यान, शेतकऱ्यांनी बभळाज उपकेंद्राशी संपर्क साधण्याचा प्रयत्न केला असता संबंधित अधिकारी उपस्थित नसल्याचे समोर आले. उपकेंद्राचा कारभार केवळ ऑपरेटरच्या भरवशावर सुरू असल्याचा आरोपही यावेळी करण्यात आला. वरिष्ठ अधिकाऱ्यांशी संपर्क साधण्याचे प्रयत्न वारंवार करूनही कोणताही प्रतिसाद न मिळाल्याने शेतकऱ्यांचा रोष आणखी वाढला.अखेर संतप्त शेतकऱ्यांनी मध्यरात्रीच्या सुमारास शिरपूर–चोपडा महामार्गावर वाहने आडवी लावत रास्ता रोको आंदोलन सुरू केले. अचानक सुरू झालेल्या आंदोलनामुळे महामार्गावरील वाहतूक विस्कळीत झाली. अनेक प्रवासी आणि मालवाहू वाहने अडकून पडली. परिस्थितीची माहिती मिळताच पोलिस प्रशासन घटनास्थळी दाखल झाले. पोलिसांनी शेतकरी प्रतिनिधींशी चर्चा करून शांततेचे आवाहन केले तसेच महावितरण अधिकाऱ्यांशी संपर्क साधून तातडीने वीजपुरवठा सुरू करण्याची मागणी केली.आंदोलन सुरू असतानाच रात्री सुमारे १२.३० वाजता वीजपुरवठा पूर्ववत करण्यात आला. त्यानंतर पोलिसांच्या मध्यस्थीने शेतकऱ्यांनी आंदोलन स्थगित केले आणि महामार्गावरील वाहतूक सुरळीत करण्यात आली.शेतकरी वर्गाने यावेळी तीव्र नाराजी व्यक्त करत सांगितले की, कापूस, केळी, मका व इतर नगदी पिकांसाठी वेळेवर सिंचन अत्यंत आवश्यक आहे. नियोजित वेळेत वीजपुरवठा न झाल्यास पिकांच्या उत्पादनावर गंभीर परिणाम होऊ शकतो. त्यामुळे शासनाने शेतीसाठी जाहीर केलेल्या वेळापत्रकानुसार अखंड आणि नियमित वीजपुरवठा सुनिश्चित करावा, अशी मागणी करण्यात आली.तसेच बभळाज उपकेंद्रातील कारभाराची वरिष्ठ स्तरावर चौकशी करून जबाबदार अधिकारी व कर्मचाऱ्यांवर शिस्तभंगाची कारवाई करण्यात यावी, अन्यथा भविष्यात अधिक तीव्र आंदोलन छेडण्याचा इशाराही शेतकरी संघटनांनी दिला आहे. या घटनेमुळे ग्रामीण भागातील वीजपुरवठ्याचा प्रश्न पुन्हा एकदा ऐरणीवर आला असून प्रशासनाने याकडे गांभीर्याने लक्ष देण्याची गरज व्यक्त होत आहे.
