सत्यध्येय एकविचार धुळे प्रतिनिधी:
धुळे शहरासह जिल्ह्यात सुरू असल्याचा आरोप असलेल्या विविध अवैध धंद्यांविरोधात शिवसेना उद्धव बाळासाहेब ठाकरे पक्षाचे युवा नेते अॅड. पंकज गोरे यांनी सुरू केलेले आंदोलन चौथ्या दिवशीही सुरूच राहिले. दि. २७ ऑगस्टपासून क्युमाईन क्लबजवळ सुरू असलेल्या या आंदोलनादरम्यान अॅड. गोरे यांनी सट्टा-मटका, जुगार, अवैध दारू विक्री, गांजा, गुटखा तसेच विविध नशेच्या पदार्थांच्या कथित वाढत्या व्यवहारांविरोधात प्रशासनाचे लक्ष वेधले आहे. आंदोलनाच्या चौथ्या दिवशी डोक्याला काळ्या फिती बांधून प्रशासनाच्या कथित उदासीन कारभाराचा निषेध करण्यात आला.धुळे शहर व जिल्ह्यात विविध अवैध धंदे खुलेआम सुरू असल्याचा आरोप करत हे प्रकार तातडीने बंद करून संबंधितांवर कायद्यानुसार कठोर कारवाई करावी, अशी आग्रही मागणी अॅड. पंकज गोरे यांनी केली आहे. अवैध धंद्यांमुळे तरुणाई आणि विद्यार्थी वर्ग चुकीच्या मार्गाकडे वळण्याची शक्यता वाढत असून त्याचा परिणाम सामाजिक वातावरणासह कायदा व सुव्यवस्थेवर होऊ शकतो, असा मुद्दा त्यांनी उपस्थित केला आहे.आंदोलनाच्या तिसऱ्या दिवशी ॲड. गोरे यांनी आंदोलनस्थळी नशेच्या पदार्थांचे प्रदर्शन मांडून या गंभीर प्रश्नाकडे प्रशासनाचे लक्ष वेधले होते. त्यानंतर चौथ्या दिवशी काळ्या फिती बांधून निषेध व्यक्त करण्यात आला. आंदोलनाच्या माध्यमातून त्यांनी प्रशासनाला केवळ निवेदने न देता प्रत्यक्ष आणि ठोस कारवाई करण्याची मागणी केली आहे.या आंदोलनातून ॲड. गोरे यांनी सट्टा क्लब, मटका, पत्त्यांचे क्लब तसेच इतर कथित अवैध व्यवहार नेमके कोणाच्या पाठबळावर सुरू आहेत, असा थेट सवाल उपस्थित केला आहे. संबंधित अवैध धंद्यांची निष्पक्ष चौकशी करून त्यामागील आर्थिक व्यवहार, पुरवठा साखळी आणि संबंधित व्यक्तींची भूमिका तपासावी, अशी मागणी करण्यात आली आहे.तसेच परराज्यातून महाराष्ट्रात येणाऱ्या प्रतिबंधित गुटख्याच्या तस्करीवर विविध ठिकाणी कारवाई होत असली तरी केवळ माल जप्त करून प्रकरण थांबविण्याऐवजी या तस्करीमागील मुख्य सूत्रधार कोण आहेत, मालाचा पुरवठा कुठून होतो, त्याचे वितरण कोण करतो आणि या संपूर्ण नेटवर्कमागे कोणाचा सहभाग आहे, याचा सखोल तपास करण्याची मागणी ॲड. गोरे यांनी केली आहे.नशेचे पदार्थ आणि बनावट दारूच्या कथित विक्रीवरही त्यांनी आक्षेप घेतला असून, अशा प्रकारांवर सातत्यपूर्ण आणि कठोर कायदेशीर कारवाई करण्याची मागणी केली आहे. एखाद्या ठिकाणी कारवाई करून थांबण्याऐवजी अवैध धंद्यांच्या मुळापर्यंत जाऊन संपूर्ण नेटवर्क उद्ध्वस्त करण्याची आवश्यकता असल्याचे त्यांनी स्पष्ट केले.अवैध धंद्यांमुळे तरुण पिढीचे भविष्य धोक्यात येण्याबरोबरच कुटुंबांवर आणि समाजावरही त्याचे गंभीर परिणाम होऊ शकतात. त्यामुळे हा प्रश्न केवळ कायदा-सुव्यवस्थेपुरता मर्यादित नसून सामाजिक सुरक्षेशीही संबंधित आहे. प्रशासनाने या विषयाकडे गांभीर्याने पाहून तातडीने उपाययोजना कराव्यात, अशी मागणी आंदोलनातून करण्यात आली आहे.दरम्यान, या आंदोलनाला विविध राजकीय पक्ष, सामाजिक संघटना तसेच विद्यार्थी-विद्यार्थिनींकडून उत्स्फूर्त पाठिंबा मिळत असल्याचा दावा करण्यात आला आहे. प्रशासनाने आंदोलनाची दखल घेऊन कथित अवैध धंद्यांविरोधात ठोस कारवाई केली नाही, तर आंदोलन आणखी तीव्र करण्याचा इशारा ॲड. पंकज गोरे यांनी दिला आहे.आता प्रशासनाकडून या आरोपांची वस्तुनिष्ठ चौकशी करून दोषी आढळणाऱ्यांवर कायद्यानुसार कारवाई केली जाते का, तसेच कथित अवैध धंद्यांच्या मागील संपूर्ण साखळीपर्यंत पोहोचून सूत्रधारांचा शोध घेतला जातो का, याकडे धुळेकरांचे लक्ष लागले आहे.या आंदोलनावेळी रावसाहेब कदम, संतोष मिस्त्री, पंकज भारस्कर, विनोद रणमळे, आप्पा लहामगे, सागर साळवे, संदीप चौधरी, सूरज भावसार, कार्तिक पाटील, संजय पाटील, प्रवीण मुर्तडक, मनोज गवळी, बंटी गोरे, गोपी सोनार, विशाल ढेकळे, गणेश पाखले, स्वप्नील सोनवणे, सौरभ जवराळ आदी उपस्थित होते.
